嗰個都話《溏心風暴3》收視唔好？但根據tvb今日公布，原來係內地官方播放網站《溏心風暴3》國/粵語播放量錄得10億！講到10億咁威風，雖然唔知係咪真係咁多人睇過，但對於劇組係幾大鼓勵㗎！所以今晚《溏心風暴3》一眾演員包括夏雨、李司祺、米雪及陳敏之等人及監製劉家豪在將軍澳舉行慰勞宴。

上星期相信最多人講嘅話題一定係陳敏之同唐文龍嘅一段情，引來不少女性觀眾討論。當中夏雨睇唔過眼，拎起杯奶茶潑去唐文龍塊面。陳敏之透露之後媽咪李司祺會勁大力摑佢一巴，笑言同夏雨潑奶茶個幕有得揮，「個日拍呢場係一take過，始終拍呢啲戲第一次係最好嘅。同埋個日天氣又落雨，好啱場戲。」

提到今次《溏心風暴3》收視下滑的原因，大部分人都歸咎於好多觀眾已經睇咗率先版，李司祺同陳敏之都覺得無可避免，當中李司祺就表示，「在場有咁多人專業人士都話遏止唔到，做演員嘅唯有做好本份。」至於陳敏之就透露自己同香港觀眾一樣同步睇直播，「我想同大家有一齊睇嘅感覺，所以我都無特別去做咩會員優先睇。」