梁詠琪（Gigi）自1995年以模特兒身份出道之後，無論是作為歌手方面又或是演員，都一直深受歡迎。其後她所演出過大大小小電影差不多40套，如《百變金剛》、《烈火戰車》、《嚦咕嚦咕新年財》等電影中的演出都令人留下深刻印象，特別是1996年梁詠琪與鄭伊健、鄭秀文（Sammi）、葛民輝演出的《百分百感覺》，更加算得上是她早年的代表作。

雖然梁詠琪由2011年和西班牙籍丈夫Sergio結婚後，電影產量就開始減少。不過今年農曆新年她將會有《西遊記．女兒國》的賀歲片上映。Gigi今日出席「世界子宮頸癌關注月」活動，接受《香港01》訪問時表示，新年前將會拍攝一套以香港大會堂作為背景的新戲。「今次會同Sammi合作，仲有甘國亮，趙雅詩等等。我諗香港人會有好多回憶，因為咁多年大會堂都冇乜點變過，而且好多人年輕嘅時候都會去大會堂睇劇同展覽。」

不過最令人期待的是，就應該是鄭秀文與梁詠琪誇越了廿載的第2次電影合作。「幾得意，因為廿年前我哋仲拍緊一啲青春愛情片，而家大家都唔係嗰個類型，哈哈。搵我拍嘅都唔係呢類型，反而係一部講心理同比較女性嘅電影（關錦鵬的《八個女人一台戲》），都好符合我哋嘅階段。我哋傾偈時都有講，大家呢20年都好多改變。」