無綫J2節目《後生仔傾吓偈》，算係比較受年輕觀眾歡迎嘅節目，除咗陸浩明、馮盈盈、麥明詩，最緊要係一眾學生KOL，講返啲貼地話題。早已經憑熊仔頭短片走紅嘅波波，經常語出驚人，成為最受觸目嘅常駐嘉賓。早前佢喺商台節目《公子會》中又爆出主動追男仔嘅原因，引來主持人森美同火火爆笑兼話：「你呢啲咪人渣囉﹗」

【食得好健康】波波進軍大台變觀眾焦點　KOL做主持一樣多人睇

【後生仔傾吓偈】波波走出錄影廠做街訪　Sandy原來係瑜伽冠軍

波波多次喺節目中爆出金句，除咗話喺屋企唔著衫周圍走，仲話鍾意同細佬攬住沖涼，令人嘩然兼有無限想像空間，呢日佢喺《公子會》中透露拍過三次拖都係自己做主動，仲話：「我可以講點解會追呢個男仔，因為我覺得佢對佢個女朋友好好……」咁咪即係見人好就要搶過嚟囉﹗呢個思考邏輯實在太特別，攪到三位主持即場爆笑，火火仲話：「你呢啲咪人渣囉﹗」而森美亦和應：「我依家好驚佢觀察到我同我老婆嘅相處，然後走嚟追我喎﹗」攪到波波勁尷尬拍晒檯話：「我唔係人渣呀，唔好公審我﹗」

之前聖誕節嘅一集《後生仔傾吓偈》，波波以一身透視裝亮相，幾乎透明嘅面衫，完全透出黑色內衣，睇到大家眼都突埋，大家依家去搜尋引擎輸入「波波黑」，自動彈出嘅第一個聯想語句，亦即係全球被搜尋次數最多嘅語句，係「波波黑Bra透視裝」。呢日佢就話：「其實無諗過咁透，唔同燈睇無咁透架。因為嗰集Topic係機心。森美即時話：「你係咪睇錯呀﹗係機心唔係雞心喎，你依家露出個雞心喎。」