【農曆新年】鄺美雲連續28年探訪老人院 　「好似家人嘅感覺」

鄺美雲（Cally）素來有人鄺美人之稱。她除了出名人靚及疼錫愛犬之外，更有名於樂善好施。趁著農曆新年，Cally更身體力行，於初二到訪「梁球琚敬老之家」探望老人家。出錢出力為老人家添置衣物冷帽以及派利是，為老人家送暖。不過原來Cally已是連續20多年（接近28年）到訪該老人院，中間更從未間斷過。這個習慣背後的原因，原來就是因為她的外婆。

鄺美雲接受《香港01》訪問時說：「我14歳時媽咪唔喺度，嗰陣時係由外婆湊大我。外婆咁多年都跟我住，所以每逢老人家唔舒服我都知佢好辛苦。我依家都50幾歲，我會諗如果啲老人家在老人院住，大家係咪需要間中探訪下佢哋，同佢哋傾吓計呢？」

説起當初為何會開始探訪老人院時，Cally就提起了探訪老人院的另一個原因。「好多年前我哋做歌手嘅時候，都有好多義唱，去好多老人院、醫院表演。我嗰時就有個心願：除咗做義務工作，仲要出錢出力，令自己係工作上可以做好啲，同時亦喺物質上可以支援其他人。呢個又係自己嘅工作動力之一。」

「我仲記得以前呢度有個琴，依家呢度仲做咗個老人音樂劇院添。佢哋係好有水準，會諗一啲方法出嚟令老人家開心。唱下歌、跳下舞、郁下做下運動，呢個係令到人開心。如果就咁睇電視，參與度冇咁高。譬如頭先有個95歲老人家，仲做緊『主播』，幫手講故仔。其實會令到佢哋健康，俾個使命感佢哋。」每年的探訪，已令鄺美雲與公公婆婆變成了家人一樣。派冷帽派利是時，不少老人家見到鄺美雲時更十分開心。

常言道，要堅持做一件事並不容易。更何況是鄺美雲堅持了二十多年的老人探訪工作。不過鄺美雲說起這個舉動時卻不以為然。鄺美雲：「其實呢個世界係互動，並唔係睇你幾多歲。每一年嚟，除咗我祝福佢哋，佢哋都會祝福我。我覺得人與人之間嘅愛，就係呢度，係好感動嘅，好似家人嘅感覺，所以我就每年年初二都有嚟呢間老人院。」