【流氓大亨】劉嘉玲花1年時間苦練廣東話：日日讀報紙新聞版

由唔係講慣廣東話到講得如此流利，咁到底嘉玲當年有無苦練過呢？她說：「有㗎，好努力咁練習，有下過苦功㗎。嗰時讀訓練班，我日日都讀報紙，大聲讀出嚟錄埋音畀語言老師聽，畀佢幫我逐粒音去改，話返畀我知應該點講先啱，我就再練過，都花咗1年時間，好彩嗰時我得17歲，學得比較快同容易。」嘉玲謂當時每日都會讀報紙的新聞版：「新聞係最難讀嘅。」

經典劇集重播，嘉玲卻沒有捧自己場，就連無綫的其他劇集都沒有看，貴為國際級影后的她更開始批評港劇。她坦言：「我好耐無睇香港啲劇喇，我鍾意睇大陸劇，時裝、古裝、警匪片等等咩類型我都會睇。我覺得依家啲港劇落後過大陸太多喇，以前啲港劇就好睇，依家嗰啲已經畀大陸劇追過晒，大陸無論劇作、導演等各樣嘢都好專業。香港都可以追返嘅，但要從多方面去配合。」而已經12年無拍劇的嘉玲就剛拍完一部大陸劇，暫時未知香港有無得播。