黃子華教路買飛攻略 棟篤笑以香港生活為主題
撰文:鄺鈺瑩
出版:更新:
黃子華落實於7月舉行棟篤笑,消息傳出之後,網上已經有人話可以訂到內部門票,但代購費講緊係門票嘅一半或以上,雖然正式開賣日子未公布,但怕且絕望座位表好快會重現江湖。到底有無任何買飛攻略呢?黃子華出席其主演嘅《棟篤特工》慶功宴時,接受01訪問時就話:「我諗今次開咁多場,會有足夠嘅門票啦,一開17場喎,過往都係得11場。」
咁實質嘅撲飛攻略到底係點呢?子華就好淡定咁話:「真係唔使撲,夠飛嘅。」嗱,大家可以截圖為証。相隔三年再次開棟篤笑,子華表示今次個騷屬於香港限定,但內容關於啲乜,佢就話忙完電影宣傳再度,但會以香港生活為主題。「我個騷最好就係無surprise同無嘉賓,同埋今次盡量唔唱歌啦。」
除咗棟篤笑引起全城期待之外,子華同佘詩曼主演嘅《棟篤神探》以四千萬票房成為賀歲片冠軍,一洗票價毒藥之名,當事人都話開心呀。「你諗吓我《一蚊雞保鑣》收11萬,依家收4千萬,感覺真係好難講,原來點都係會發生,奮鬥係有用,雖然我《一蚊雞》時都好奮鬥。」他表示最怕連累老闆蝕錢,直到票房過三千萬時,老闆告訴他「其實有賺」才放下心頭大石,他更笑言如果唔係要準備棟篤笑,應該會馬上再拍電影。
+3