【Do姐有問題2】有趣味有資訊 加埋一班靚女做外景主持真係贏晒
撰文：黃梓恒
出版：更新：
《Do姐有問題2》終於播放，鄭裕玲和農夫這對笑死人組合又再次合作，連Do姐在節目中也忍不住問道：「點解又係你哋？公司係咪懲罰我呀？」無辦法喇！鬼叫這對組合極受歡迎，觀眾每次看到他們的節目到笑到碌地，作為TVB的高層，當然想到要添食，唔係仲點會叫TVB？
終於又見返佢哋。（資料圖片）
今次節目主要環繞著一些旅遊熱點的偏門知識，睇落有點像之前森美大哥的《千奇百趣》，不過其實咩節目內容都不太重要，最緊要係有農夫同Do姐。在上一輯《Do姐有問題》的時候，每次Do姐出場，農夫便會以她的名字搞個食字gag，今輯一樣有，不過就轉了用在嘉賓身上。今集嘉賓有唐詩詠，C君就話:「好多人鍾意玩渡海泳，但係嚟緊可能唔只搞渡海泳，搞唐詩詠。」嘩！乜你咁講嘢呀，唔只一個gag，仲有一個：「嗰日我見到個𡃁仔喺維港兩岸背唐詩，我問佢搞咩，佢話搞唐詩詠香江。」呢個就高質喇！
食字gag已成為節目招牌。（電視畫面）
今集除了睇主持之外，仲有一個亮點，就是一班帶大家去世界各地旅遊景點的藝人，包括去美、加、法的梁芷佩Christy，有日本團的鄺潔楹Judy和陳婉衡Alycia，韓國代表有葉韋彤K小姐、潘梓鋒Brian和陳雅思Bonnie，泰國方面有泰國通胡慧沖Roger，而台灣則有梁凱晴Nina，真係要睇女有女，要睇旅遊達人一樣有。加埋配音員馬家豪以星爺腔的抵死配音，成個節目有資訊性兼娛樂性，又真係抵佢有得添食！
一班外景主持都好值得留意。（電視畫面）