Netflix人氣劇集《黑鏡》（英文：Black Mirror）第四季已經完結，相信唔少觀眾都知道呢套劇估中咗好多預言，好似無線充電、全面屏手機、3D打印等等。

唔知大家仲記唔記得喺第三季嘅第一集《急轉直下》（英文：Nosedive）中，講述嘅未來社會實行信譽評分嘅社交軟件功能，所有人都可以互相為對方打分，這個分數決定咗一切。以五分為滿分，人嘅待遇會隨著分數嘅高低而區別對待，評分嘅加減亦都會視乎對人接物嘅態度有所加減，每個人一定要有足夠嘅分數先可以享有必需嘅生活資源，反之會被人看作可恥嘅對象，仲要被收監添！好似劇中嘅Lacie（Bryce Howard飾），有4.2嘅佢為咗提升自己開社交媒體知名度，用盡方法去討好人，目的就係要躋身更高分嘅社交階級，完全就係戴著一塊假面具做人，而佢越係急功近利，越係離自己嘅目標越嚟越遠。

但係呢種評分制度喺現實生活中的確存在！

好似喺中國江蘇省嘅一個縣城就有試行過「社會信用制度」，以1,000分為基本分，行為良好嘅市民就有分加，反之就減。分數越高嘅市民，待遇自然好過低分人士，分數越低，就唔會有政府援助同僱用。

同樣為信譽評分嘅APP仲有支付寶中嘅芝麻信用評分，主要包含用戶信用歷史、行為偏好、履約能力、身份特質、人脈關係五個方面，雖則未去到低分會被收監，但分數嘅高低依然影響個人嘅自由度，分數由350-950分，分數越高，喺借貸、租車、訂房甚至簽證方面等都會有優待！好似可以免費騎行、免費租車等。

呢種制度某種程度上講係有利於規範個人行為，自我監察，為獲得更好嘅待遇努力。但係另一方面，呢種制度都極有可能造成人性嘅貪婪，使人慾望膨脹，長久落去可能會將隱于深處嘅暴力同殘忍顯露無遺，真係細思極恐！如果未來社會真係要人同人評分，我哋應該如何面對？