網友暗串借洪永城炒作　唐詩詠嬲爆：記者問定自己提你都分唔到？

宜家做藝人一啲都唔容易，要做好幕前工作之餘，工餘時要經營社交網站，Facebook、IG、微博……唔單止要勤於更新，貼相貼片分享生活點滴，得閒仲要同粉絲交流覆留言。唐詩詠IG有近50萬Followers，佢都已經相當勤力啦，幾乎隔日就update一次，有時仲覆下留言，估唔到呢日佢會同網民正面駁火，似乎真係嬲嬲地喎。

事緣Nat上載一張造型照，拎住個菠蘿造型手袋相當攪笑，留言話：「帶住個金波羅去街街。」本身只為分享當日工作照，fans爭相讚好可愛，不過有位J網友忽然寫上：「唐姨唔好再煲新聞喇﹗」喺唐詩詠嘅IG留言，呢個「唐姨」應該係話緊Nat無誤，本來呢類負評經常可見，好快就會被fans洗走，勢估唔到Nat會秒覆一句：「新聞冇得自己煲的。」就係咁，戰火就開始啦。

J網友話：「呢幾個月有意無意提起洪仔，居心叵測。」呢個洪仔就當然講緊Nat前度洪永城啦，唐詩詠好快又覆咗：「係記者問定自己提你都分唔到，呢段對話可以唔使繼續。have a good day﹗」

去到Have a good day，其實唐詩詠都有意停火㗎啦，不過J網友繼續列舉事例，話Nat喺訪問中提到手機密碼會用男友生日日期，係有意扯上感情事製造話題。Nat又再回覆：「珍惜那些相信你，鼓勵你，看見你價值的人，因為他們讓你更加相信你自己。同時也要理解與包容那些否定你，挑剔你的人，因為他們會令你更加堅強。」之後佢就無喺呢個post再覆留言啦，不過戰火並未停止，變成唐詩詠粉絲 VS 反唐詩詠嘅網友對罵，至今仲對罵緊。

唐詩詠入行多年，終於喺今屆台慶憑住《不懂撒嬌的女人》勇奪視后，由於同劇仲有公認嘅演技派宣萱，令部分人覺得有不公之嫌。唔理大家認唔認同，Natalie係今屆視后已經係不爭事實，但呢個世界有言論自由嘅，有人鍾意亦一定有人唔支持，做得公眾人物好多時都睇化晒啦，負面留言當睇唔到就算，估唔到Nat今次會沉唔住氣同佢地唇槍舌劍。