由馬浚偉及胡定欣主演的舞台劇《偶然．徐志摩》周日（15日）已經到公演嘅最後一場，大功告成演員心情如何呢？二人表示係呢一刻只是想尖叫，定欣首先講出心情，「琴晚已經開始好唔捨得，到今日呢一刻終於鬆一口氣，你（馬浚偉）都終於唔洗再死，唔洗再為佢流淚。」而馬仔講到呢十一晚都其實死一次都好慘，「你知唔知道每晚死一次好辛苦，每次行天梯後抽泣出嚟謝幕，大家又拍哂手掌，我個樣係好慘。」

定欣今次舞台劇後直言從此愛上，點解呢？定欣解釋：「今次演出已經遠超我所想嘅收穫，好多觀眾嘅反應啦，舞台上學到嘅事情啦，做戲感受等，全部都係我意想不到。」身旁嘅馬仔都講到其實定欣本身係讀中國舞，「讀中國舞嘅人其實對動作嘅姿態一定係有，加上拍《深宮計2》我睇到佢跳舞，覺得好靚，所以覺得佢好合適做陸小曼一角。」不過馬仔再提到點樣去勸說定欣參演呢一套舞台劇呢？「就係凌晨短訊搵佢，再係佢朝早收工再加表演環節，趁佢未清醒，咁就成功。」

而二人係訪問時，天上傳來滴水聲音，聲音響亮，馬仔都留意到，衝口而出地講：「唔係黃雨嘛，唔關我事㗎。」睇嚟馬仔尾場又做「雨神」，網友又要召喚佢啦。問番重點今次二人為咗演出，體重方面更下降好多，會食咩慶功呢今晚？定欣表示：「我想食啲最煎炸嘅食物，因為忍口忍咗好耐啦。」馬仔直言羨慕定欣，點解？「因為仲有兩場舞台劇要去星加坡公演，之後仲有一堆演出。」