【走進世界各式天牢】苦命男坐12年冤獄仲未夠　亂入巴西監獄探險

巴西監獄近年不時都發生暴動，去年更出現斬頭、挖心、挖眼珠等等殘暴手段，Netflix節目《Inside the World's Toughest Prisons》(中譯：走進世界各式天牢)主持人Raphael Rowe唔怕死，決定將與囚同眠一星期。

其實Raphael Rowe曾在英國因打劫、殺人被判終生監禁，但坐咗12年後被無罪釋放。雖然曾經都係囚犯，但當要進入位於巴西西北部首府維洛港（Porto Velho）、被喻為世界最危險監獄的前夕，Raphael Rowe都表示心情十分緊張。之所以有最危險監獄是因為呢個有8千囚犯嘅地方，15年來曾發生5次暴動，起因主要係當地兩大幫派紅司令幫以及首一令幫之爭。

維洛港監獄由九個獨立獄所組成，主要係囚禁三流罪犯、運毒、強姦、同殺人犯，由於巴西對毒品零容忍，加上巴西法律並唔係以數量而係行為去判刑，所以就算藏有少量毒品，都隨時判５年以上，亦因為咁，令呢個監獄十分擠迫。所有犯人到步後，先會分派到名為「潘吉納」嘅囚房，進行一年以上的危險以及幫派評估，呢個步驟好重要，因為如果去錯牢房隨時有生命危險。Raphael Rowe入倉後第一感覺就係悶熱同臭氣薰天，但與此同時，亦都覺得十分奇怪，除為囚犯並未有穿上特定的制服、可以隨時抽煙，最奇怪係連貓同狗都有。但最好笑係入住邊個囚房，原來要由犯人自行選擇，如有任何困難的話，獄警就提議Raphael Rowe去搵某個囚犯，話佢可以幫助大家適應鐵窗生活。

不過令主持人Raphael Rowe更大開眼界嘅係探監日，每逢探監日，囚犯都會拎埋床褥去到會見女友或老婆，原來在牢房旁邊，設有12間房客，囚犯可以同女友／老婆趁機happy一番！聽落又幾人性化喎……之不過，獄警每逄探監日都特別緊張，因為隨時都會發生暴動。

到底呢個世界最危險監獄內有什麼？即時睇睇。