陳柏宇太太重提穿羊水過程 投訴老公幫唔到手︰佢扮聽唔到繼續瞓

撰文:張嘉敏
出版:更新:
Jason呢個新手爹地真係好搞笑。

陳柏宇 (Jason) 同老婆符曉薇 (Leanne) 的愛情結晶品日前已正式面世,Jason見到囡囡Abigail出世一刻仲感動到爆喊。作為新手爹哋的他當然有好多嘢要學,原來他在老婆臨生之前都因為無經驗,險些搞到老婆穿晒羊水都唔入醫院生B。今日Leanne就於IG發長文,大爆老公Jason因為無知所犯下的「惡行」,仲稱呼老公做「粉蛋」。

佢錫到囡囡燶。

Leanne出post名為《生產記》表示:「首先25號9點幾起身痾尿,點知好似唔識停咁,仲有少少血,心諗呢啲會唔會叫做穿羊水呢?我仲喺廁所大叫陳廣偉 (即Jason),點知條粉蛋以為我叫佢執屎執尿,佢扮聽唔到繼續瞓覺!我唯有着返條褲,入房攞返部電話,嗰個時候啲水係仲流緊。打電話去到醫院,姑娘已經叫我哋即刻過去,我就入房拍醒條粉蛋,出門口嘅時候我仲同佢講,攞埋個走佬袋出去。點知佢同我講話唔使,佢話唔似有啲乜,人哋拍戲嗰啲唔係咁,如果真係要生嘅先返嚟攞。」

佢呢兩日全力湊女。

「最弊嘅係我竟然聽佢講!去到醫院姑娘檢查完就話係穿羊水,即刻call醫生返嚟接生。之後條粉蛋仲同姑娘講,乜同拍戲咁大分別嘅?乜穿羊水咁平淡?姑娘同佢講嗰啲係做戲。」下刪數百字,最後順利生B的Leanne最深感受竟然係:「原來生小朋友都唔可怕,最可怕係個老公日日夜夜對住你個女係咁影係咁影。」陳爸爸真係好搞笑呀。

Jason畀老婆話佢狂影囡囡相。
你可能感興趣