有「大馬郭雪芙」之稱的黃潔琪（Miko）今日（11日）在銅鑼灣出席《校花校草選舉2018》活動。Miko透露讀中學時曾被同學欺凌將近兩年。「嗰陣時我讀緊女校留長頭髮，佢哋會整蠱我，搞我啲頭髮，啲女同學會無緣無故叫我個名戲弄我，行過課室又會叫囂，去廁所又會跟住我，會用兇狠目光望住我，搞到我唔敢望人，我唯有唔理佢哋，一段長時間後，佢哋都覺我冇嘢好玩，佢哋都冇再搞我，最終都冇成為朋友。」

樣靚身材正的Miko在馬來西亞土生土長，自爆當年放學時回家中途險遭人性侵，幸好當時附近有人目擊，事後仍有餘悸。「嗰陣時我16歲讀緊中學，當時係下午3點幾放學行緊返屋企，突然之間有人從後箍住我條頸，我嗰一刻即刻大叫，我俾佢按咗落地，當時附近有人聽到我大叫，箍我頸嘅男人即刻放手，我就即刻起身轉身走，嗰個男人仲大叫問我：『呢度好危險，使唔使我送你返屋企。』當時我同佢相距10尺，我話唔使，就快奔返屋企，啲手腳跌落地時擦損晒，呢件事我都唔敢話畀屋企人知，怕佢哋擔心，之後我買咗啲防狠噴霧傍身。」