【跳躍生命線】冼灝英想做有發揮角色 已舖定後路作最壞打算
由馬德鐘、何廣沛、劉佩玥和羅天宇主演的無綫台慶劇《跳躍生命線》播出後一直大獲好評，不少人都大讚劇情夠真實之餘，亦讓參演配角有所發揮，好像楊卓娜在第5集的喪夫爆喊戲以及張文慈在第17集的離家出走崩潰戲，均令觀眾感受甚深，忍不住流下熱淚。
不過，並不是所有配角都有機會能夠在劇集中一展所長，就好似飾演救護學院教官「方Sir」的冼灝英只出現得兩三幕，對白不多之餘，觀眾亦看不出在他身上有甚麼故事，到一班救護員畢業後便完全功成身退，作用就像一個懂得呼吸的擺設。
請不要忘記冼師傅冼灝英是圈中數一數二的武林高手，1975年隨「猴王」陳秀中學習大聖劈掛的他，在1983年入讀邵氏第6期武訓班後成為武師。他90年代開始將重心放在幕前演出，為亞視拍攝多套作品，不少角色更令人印象深刻，包括《我和殭屍有個約會》系列的孔雀大師和《精武門》的石井弘。2005年重返無綫後，他拍過超過50套劇集，當中更有不錯的演出機會，《賭場風雲》角色Kill標和《古靈精探》角色小鳳姐等均甚有發揮。2012年，他轉投香港電視（HKTV），拍了9套劇集，到2014年便再次重返無綫。
點擊片段觀看冼師傅在《精武門》與宇宙最強甄子丹的對打場面：
雖然2014年後冼師傅為無綫拍過超過20套劇集，但其實發揮空間比起以前大大減少，由《鐵馬戰車》角色戴軍叫做「有啲戲做」，到在《翻生武林》、《再創世紀》和《跳躍生命線》中行行企企，可算是愈做愈頹。提到這點，冼師傅接受《香港01》訪問時說：「冇計，重點角色都唔會去我哋度，有其他同事情況都係咁，好似由HKTV返嚟後就畀人投閒置散，而家《跳躍生命線》宣傳都冇人叫過我去。」
問是否想重拾老本行，演一些有動作成分的角色，今年61歲的冼師傅說：「咁又唔係嘅，演員係樣樣嘢都想試，打都打咗幾十年，未算手到拿來，都可以話係做得唔錯，都想試下唔同角色，唔同演戲境界。（想做重要角色？）我係想做一個有故事嘅角色，重唔重要唔係好緊要，唔使20集都係我，係可以有發揮。」
冼師傅好清楚自己不是後生仔，不是想與一班小生一爭長短，只是眼見其他同事有發揮空間，而自己的努力沒有應有回報：「大家都係要捱更抵夜，但係我嘅工作帶唔到滿足感畀我。（有冇諗過走？）其實王貽興拍《VR驅魔人》時都有搵我，但係我咁啱舊年同TVB續約，所以應承唔到，我而家同TVB都仲有兩年約。（敲監製門口？）喺公司見到方駿釗監製、羅永賢監製同陳耀全監製都有傾下嘅，但其實我份人都唔係好知點樣Social。」
其實冼師傅明白長此下去不是辦法，加上周身傷患，所以都學定一技之長：「我去咗學中醫、推筋、針灸咁，如果都係咁，我諗我兩年後都會轉型。（兩個仔都出咗身，其實退休都冇問題？）大仔做咗三年嘢，細仔剛剛畢業開始返工，但人唔可以退休嘅，都要做嘢，只係揀啲冇咁大壓力嘅嘢做。」
至於有否後悔當年轉投HKTV，冼師傅便說：「冇後悔，當年係因為同蘇萬聰合作得好愉快，所以一班人過去，大家都係鍾意拍嘢，其實我返TVB都好隨緣，係羅永賢拍《名門暗戰》時話有啲動作戲想我返嚟做指導，佢同上面提出，上面又OK所以我就返咗TVB。」