《皓鑭傳》講述趙國御史之女李皓鑭（吳謹言飾）、商人呂不韋（聶遠飾）以及喺趙國做人質嘅秦王孫（茅子俊飾）三人之間故事，而李皓鑭嘅歷史原型，相信大家都應該知道就係秦始皇之母趙姬。雖然對於趙姬嘅種種，《史記》並未有太多嘅記載，但過往無論係大台所拍嘅《尋秦記》、抑或內地嘅《秦時麗人明月心》，以至未播出街的《巴清傳奇》都一定會有趙姬蹤影。

至於第一位飾演趙姬嘅演員，原來係鮑起靜。1986年由亞視製作嘅《秦始皇》長達63集，劇中鮑姐飾演嘅趙姬善於舞蹈，亦同樣係會遇上已故藝人黃偉飾演嘅呂不韋，但唔同嘅係趙姬雖已懷上呂不韋嘅骨肉，但呂不韋為家族利益，而將趙姬連人帶B送贈予喺趙國做人質嘅秦莊襄王。愛夫心切嘅趙姬，喺別無他選下嫁入秦家……最正嘅係嬴政竟然係喺逃難時，於雪地出生，而見證呢件事嘅除有秦莊襄王之外，仲有呂不韋，劇情一絕。

鮑姐於79年加入麗的電視，其後轉投亞視，拍攝《秦始皇》時為37歲。如果以年齡計算的話，比起飾演過趙姬呢個角色嘅吳謹言同姚瑩瑩都要年長一截，但鮑姐喺劇中嘅妝容無論係少女定皇后都剛剛好，同呂不韋嘅姦情戲，亦都十分出色。再加上劇集有胡楓、米雪、馮寶寶、劉松仁等人，令劇集被喻為亞視神劇之一。

【周五心意運動】您捐一封$50利是，已可為基層送上溫飽，01心意呼籲您支持【香港青年協會】 ，每$50即可製作5碗愛心湯和心意禮物：https://heart.hk01.com/zh/project/10095