韓馬利突患腦膜炎 網上自爆入院兩星期:同死神搏鬥!

撰文:洪曉璇
出版:更新:

Mary姐韓馬利入行多年,拍過唔少經典劇集,喺剛播完嘅《十二傳說》中飾演林夏薇媽媽Forture姐,同現實中嘅另一半杜燕歌有唔少對手戲。8月初都仲見到佢出席宣傳活動,但原來佢身體出現問題,更透露自己「同死神搏鬥」,嚇壞唔少朋友。

8月7日韓馬利同《十二傳說》一眾演員出席宣傳活動。(資料圖片)

自8月9號出post後,相隔大半個月去到28號,Mary姐先至再次更新Facebook,但就為大家帶來震撼消息,佢留言話:「經過兩星期同死神搏鬥,感謝天父的保守我今天終於可以出院了,但因身體仍十分虛弱故未能一一回覆各位的問候,我只有祝大家身體健康,真惜生命和感恩過每一天」

韓馬利透露自己大病一場,嚇壞唔少朋友。(Facebook:韓馬利)

文中Mary姐未有透露係咩病,但講到要同死神搏鬥就令唔少朋友非常擔心,好似汪阿姐就話:「Mary姐、你要好好休息、保重身體呀!」車淑梅、楊怡、陸浩明等都有留言慰問。之後,Mary姐回應傳媒時便透露自己患上腦膜炎。

Mary姐近年不時同老公杜燕歌一齊拍劇。(Facebook:韓馬利)

上月剛度過65歲生日嘅Mary姐,1976年入行至今已經43年,佢喺今年初嘅節目《不老傳說》中,分享過多年前曾患上焦慮症的痛苦經歷,佢話:「有一日我食飯手震,震到不得了,個心跳得好緊要、窒息、唞唔到氣、成身出汗、同埋好驚、好慌,你問我驚咩?我真係唔知驚乜嘢,個感覺就好似突然間去咗個好深、好黑忟忟嘅洞入面、曾經最嚴重嘅係連沖涼都唔到。」入行以來佢都算係多產演員,曾經一年8套作品,但近2年有減產跡象,各拍2套劇集,加上今次大病一場,相信要一段時間後先再見到佢露面啦。

Mary姐喺今年初嘅節目《不老傳說》中,分享曾患上焦慮症。(電視截圖)
+1