【流行都市】安德尊串廚師Annie孤寒 主持節目變搗亂

撰文:陳芷穎
出版:更新:

TVB節目《流行都市》經常邀請廚藝專家教觀眾煮簡易菜式,因應新冠肺炎(俗稱:武漢肺炎)肆虐本港,廚藝專家黃婉瑩(Annie師傅)就教大家煮「黃金葡汁四蔬」來增強免疫力。不過網民的焦點就落在主持安德尊(大王)身上,全因他在下廚時頻頻爆出金句,令Annie師傅和主持劉彩玉、吳天佑,焦浩軒都冇佢符。

大王爆出多句金句,令Annie師傅和劉彩玉都冇佢符。(《流行都市》影片截圖)

安德尊寸Annie師傅孤寒

一開始,Annie師傅簡單介紹材料,包括白色的叫椰菜花、綠色的就是西蘭花,大王突然說:「你應該問一問天佑呀頭先!」疑似嘲諷現年27歲的新晉主持吳天佑,Annie師傅立即說天佑當然識分這兩種菜。材料準備好要汆水,安德尊非常心急,想將所有材料一次過倒落熱水,Annie師傅出手阻止並說是有步驟的。

接着Annie師傅將菇粒放落鑊炒,吳天佑問:「使唔使揀鹽味牛油再香啲?」安德尊隨即向着天佑說:「你過嚟呀!你過嚟呀!咁多問題!」Annie師傅解釋選用了法國牛油,非常香口,安德尊又質疑她為何不將全部牛油放落鑊:「你孤寒啫,靚牛油。」材料汆水之後,安德尊問吳天佑覺得他們合作如何?天佑反駁:「有啲亂囉,大王你,心急呀。」

點撃睇安德尊與其他主持互動:

+5

來到最後的整葡汁環節,Annie師傅加了薑黃粉、椰汁等,吳天佑問:「落忌廉得唔得?」Annie師傅笑言太貴,安德尊隨即說:「富家子弟真係富家子弟!我唔係富家子弟啫,都知道啲嘢。」及後安德尊幫忙拿起鑊子,Annie師傅直線抽擊:「你今次最有用。」Annie師傅說,整葡汁不用加芝士粉,但在旁看着的焦浩軒,突然「衝出來」提議可加芝士粉在葡汁上面,結果安德尊立即「開火」:「唔加梗係有佢理由,你問埋啲全部廢問題!」場面一度尷尬。整個煮食環節全長10分鐘,未知安德尊是否刻意製造氣氛,才如此不留情面的諷刺拍檔,網民就覺得整個過程充滿火藥味,更直言大王是廚師的「天敵」。

焦浩軒、吳天佑,都冇大王符。(《流行都市》影片截圖)
你可能感興趣