【疫日搵食】試業4個月仍未開張 可嵐：每日生意目標係$2,000
去年12月尾，可嵐與拍檔選址在紅磡開餐廳，其中一原因，在於餐廳對面三所學校能為舖頭帶來穩定的生意：「當初我哋改舖頭名做『榕易‧樂堂』，都係想畀啲學生一個開心啲嘅感覺，希望啲時間可以過得快啲，快啲落堂啦！」
2020年1月25日，香港政府宣布延長農曆新年假期至2月16日；
1月31日，教育局宣布全港學校最早於3月2日復課；
2月13日，教育局宣布全港學校進一步延遲復課兩星期，最早於3月16日復課；
2月25日，教育局宣布全港學校再進一步延遲復課，最早於4月20日復課，但確實復課日期有待進一步評估；
專訪當日為3月10日。
榕易‧樂堂：「紅磡崇安街23號環海東岸SodaMall商場地下8號舖」
疫巿之下，很多飲食業難以維生，食客銳減，生意額相對也大幅下跌，聽起來的確可怕，然而，即使可嵐當初以「學生」為主要目標巿場，她受訪當日亦未覺太過悲觀：「收入就當然一定會有影響㗎喇，但調返轉去諗，我覺得都好嘅，有一段時間畀我哋去做好個運作，流暢度呀，又或者係我哋想加嘅嘢都可以加好晒先。」
多元抗疫
可嵐除了是歌手、藝人、餐廳老闆之外，也是一名咖啡師。專訪當日，可嵐稱她將會在餐廳內售賣意式咖啡，親自選購個人喜好的咖啡豆，希望可以開拓多一條生意門路：「肺炎期間，大家都努力緊，想舖頭可以多元化啲去增加生意，（其實對比開業最初，生意額下降了多少？）其實初初開嘅時候，啲學生已經係開始放假，呢個亦都係一個新嘅商場，所以我都未睇到佢有一個太大嘅波幅，但其實都有上升咗嘅，我用守嚟形容啦，（肺炎對生意不算太大影響？）唔可以話唔算，因為新嘗試，其實做多餸飯我係從來都未做過，一路交緊學費嘅時候，仲要交喺呢個疫情期間，似乎係一個無底深潭，（你預計咖啡能夠為你帶來幾多生意？）我覺得會為我帶嚟樂趣多啲。」
試業4個月
「呢度其實係12月尾開始試業，咁就一路試業試到依家都試緊！」幾聲苦笑後，可嵐繼續分享經營劣況：「原本預計係試1個月左右，過埋個農曆新年就正式開張。但一新年之後就開始疫情，所以就繼續試業，（打算試到幾時？）試到疫情過咗，等大家都放心出街先正式做一個靚靚嘅Opening咁。」最初打算待學生返學後，生意可望大幅增加，但試業期間撞正疫巿，學生算盤完全打不響，可嵐唯有持著打落門牙和血吞的心態繼續做：「其實有諗過真係停業，（未正式開張就停業？）係呀，因為嗰時真係冇人敢出街，同埋我自己更加擔心係同事嘅安全。」雖然到最後可嵐和員工商量後決定繼續營業，不過上班人數縮、準備的食材縮、營業時間縮，就連目標生意額亦大幅調低：「我哋嘅Target，係$2,000，（每日的營業額是$2,000？）係，（但人工、舖租、食材、成本總共也不止這個數吧？）差不多，原先我哋開店嘅時候，個目標一定唔止呢個數，呢個係我哋打和嘅數。」但可嵐透露，上月仍然要掏腰包幫補餐廳的開支。
商演、配音、教唱歌、教沖咖啡、教國語，全是外快
除了是餐廳老闆，可嵐也是歌手、藝人、咖啡師之外，她的「外快」來源還有配音和教國語，而且是一名單親媽媽：「所以時間上分配係好困難，（這些工作的收入比餐廳好吧？）暫時都係，（為什麼仍打算要堅持？）都係一份熱誠。原本我去做糖水，都係想為我個仔留一點味道，有時我做嘢太忙，冇乜時間可以陪到佢，都會好內疚，冇乜幾可煮到餐飯畀個仔食。我係一個單親媽媽，向現實低頭我已經好忙，冇時間陪到佢，但我都有啲嘢畀佢記得，一啲係媽媽畀佢嘅嘢。」
Eugene，我得一個人，得一對手，其實我真係好愛你，但我唔知道點可以話畀你知媽咪點愛你，或者可能因為你細個，你未明白，但我都盡我可能做所有嘢。或者你唔明點解媽咪喺見到你嗰僅有嘅時間都要係咁話你，因為我好想你大個仔，真係可以識得照顧你自己，我好驚我有一日會唔喺度。