【影片】與陳安立挑戰何文田站300級樓梯　蘇伊俊：歡迎挑戰！

觀塘延線通車已兩天，但依然是城中熱話。皆因有網民發現何文田站由月台行去A3出口的樓梯，竟然有成562級樓梯，即是25層樓咁高。如果要舉辦跑樓梯大賽，不用去國金，何文田站A3出口都幫到你。不過話分兩頭，ViuTV節目《體育係...》主持陳安立（Brian）與甲一籃球員兼主持蘇伊俊今日下午就有Facebook直播，玩何文田站跑樓梯challenge，平時做開運動真係有著數，加上兩人身高過185cm腳超長，最後輕輕鬆鬆鄧梓峰，在兩分鐘內完成，還公開邀請其他人參加。

兩人事後接受《香港01》訪問，不約而同地話日常喜歡運動，眼見最近這條樓梯成為話題，趁有時間就去挑戰下，順便練一練體能。而Brian就話平時在gym房做運動，又只是不停舉鐵悶悶哋，「不如喺街玩下啦，雖然for fun，但咁樣都幾得意。」不過，2分鐘就完成562級似乎快得濟喎！原來他們到閘口才開始跑樓梯challenge，但依然有約300多級樓梯要行，最後2分鐘內完成。Brian表示：「雖然都有跑，但未出盡全力。希望遲下都有機會跑足562級，如果全力跑，3分幾鐘就應該完成到。」至於蘇伊俊就話：「一來做開運動，二來腳長都有著數，所以好快就完成到。沿途仲見到學生喺度行㖭，佢哋都幾勇猛呀！」

雖然跑樓梯的過程見到學生行，覺得好健康，但事前準備challenge的時候，兩人曾經找職員幫手。因為Brian口中的「地獄之門」實在太隱蔽，要職員指引才知道確實位置。蘇伊俊表示：「好在都有升降機搭，而且都還有指示提到樓梯喺邊，又唔洗太擔心。」問到港鐵何文田站的設計如此特別，會否讓人感到不便？陳安立表示：「又不會，始終要兜兜轉轉地行，可能在規劃時有特別的因素。（但住在何文田的居民要行成15分鐘喎！）可能我住係西貢，出入比較唔方便，15分鐘算好快。」

兩人除了今日玩跑樓梯challenge之外，蘇伊俊日常都會打籃球練體能，keep返好個狀態，所以跑完都要返gym房。而陳安立表示將會參加11月初舉行的「The Spartan Race斯巴達障礙賽」，挑戰自己極限，所以近期都盡量操fit自己，不過Brian話：「我最想係參加好似美國節目《American Ninja Warrior》（極限體能王）的比賽，因為參加者身手好敏捷，好型！今次香港有個類似嘅，玩住先！」