【天與地】三個靚女深入200米天坑 朱智賢:諗過自己會死

撰文:
最後更新日期:

成世人流流長,除了環遊世界,還想做甚麼難忘的事?麥美恩(Mayanne)、陳婉衡(Alycia)及朱智賢(Ashley)為拍攝探險節目《天與地》,分別深入廣西40米、90米及200米天坑。三個女仔弱質纖纖,話就話有安全繩輔助兼且做足所有安全措施,但講到明探險,隨時都有意外、驚險事情發生,所以有觀眾睇節目的時候,都覺得一步一驚心。看的人緊張,爬的人簡直心驚膽顫,三人成功抵達天坑底部的一刻,不約而同表示今次的體驗讓她們上了一大課。

(左起)陳婉衡、麥美恩和朱智賢在出發之前,到獅子山進行了一連串特訓。

三個女仔超級膽粗粗,事前得知自己要深入天坑探險,沒有特別「淆底」, Mayanne最初先斬後奏,答應了拍攝才跟家人講,好在她媽媽回應:「都似係你會做嘅嘢呀!」讓她真的完全放心、放膽去天坑探險;Alicia都不弱,答應到特訓再到拍攝,都無同家人提起過,呢個決定馬上變到沉重得很!稍有差池,都唔知點對得住家人,與此同時,不得不佩服她們的勇氣。

麥美恩本身有畏高,要深入200米深的天坑,完全靠自己死頂。

要去天坑去足兩個星期,不是吃喝玩樂,而是用生命做賭注,每個決定都會影響三個人,甚至是整個團隊,三個女仔有冇擔心過有拗撬?Mayanne經驗相對比較豐富:「因為家人關係,細個都會經常到郊外camping,爸爸都教識我不少野外活動的技巧,在這次探險入面,或多或少都有優勢,可以幫到自己同大家。」Alycia雖然沒有探險經驗,但日常都會行山,她笑言被人笑指自己似阿媽:「我成日都問他們肚唔肚餓呀,好似阿媽咁,其實大家都會好take care,唔會有太大問題。」兩人都覺得在旅程上,反而互相照顧對方最重要,始終大家都需要團結一致達成目標,深入200米的天坑。

 

三個女仔聚在一起,就會講心事,回顧過去所發生的大小事,加上面對探險時的驚心動魄,難免有所感觸。

不過,Ashley的想法比較相反,本來沒有類似經驗的她,自覺比較弱,「一開始都知道,雖然之後都有做返training去補足,但拍攝的時候,都擔心自己會拖累到大家,都會有壓力。」這讓她憶起深入天坑的驚險事,「其實當時我係差少少就落唔到,因為條繩太重,之後再落去有一下我跣咗腳,好似有股離心力咁,感覺自己好似身處懸崖,有諗過自己會死。但當時就諗盡所有辦法,都要落到去,最後我用埋雙腳的力,抵達一刻真係好感動,好開心。」諗起個心真係離一離,要用盡九牛二虎之力去達成目標,哪有時間想會嗌交?Ashley說:「多謝Mayanne同Alicia好似大姐姐咁照顧我、鼓勵我,大家都係好partner。」

拍攝期間,其實都有經歷生死時刻。麥美恩親眼目睹攝製隊所乘的橡皮艇被尖石刺破而下沉,工作人員跌進水裏掙扎,器材統統都要報銷。Mayanne當時在另一艘橡皮艇,面對隊友生命有危險,「當時真係嚇親,覺得唔好做錯任何一個決定,要好好保護自己和partner,諗住去搵安全嘅嘢,提自己要冷靜,真係好深刻,係超越緊生死。」所以拍攝後期的營火會,三人大開心事台,回想探險的過程,都很有感觸,向來形象樂天開朗的Mayanne都忍不住爆喊,「因為成件事嘅成功,都充滿汗水和淚水,都希望大家可以對生命有個深思。我媽媽見我拍完呢個節目覺得我靜咗,但我覺得係一件好事,我可以更加誠實地面對自己。」

三人形象一向都好sporty!

「經一事,長一智」,三人都話今次探險之後,變得更加大膽,因為面對關鍵時刻,無論如何都要逼自己成長。講到如果有一日流落荒島,都要不斷想着求生,Alycia更笑言:「因為今次,我諗我有力爬上樹,之後係咁摘生果充飢。」雖然是想像,但試過探險之後,她更想嘗試其他驚險刺激的活動。而節目出街之後,雖然只得短短五集,但三人覺得探險經歷是一生一世,讓她們變得更加正面,亦希望觀眾看到後會有共鳴。

去完探險之後,Ashely同Alicia都話往後想試下更多刺激的活動,但Mayanne就話要諗諗先。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。