【特首選戰】麥明詩：佢肯聽民意係好事 林作：像董伯伯搵下台階
特首梁振英宣布不會參加下屆特首選舉，仲話要留時間照顧好家庭，在社會同家庭之間，梁特首明顯選擇了家庭。消息曝光後，除港視股價暴升五成外，不少娛樂圈中人亦紛紛表態支持，有人留笑臉，有人跳舞歡送，而麥明詩則指梁特首肯聽民意是好事，而他的前男友林作更稱會私底下問齊昕，眾人回應不但抽乾水，而且娛樂性十足。
問到特首講到自己因為家庭問題而不爭取連任，麥明詩話：「人哋家事就唔去點評論啦，始終我都唔清楚。」咁特首唔爭取連任對香港係咪好事？佢只答：「肯聆聽民意係好事嚟嘅。」除了特首聲稱自己有家庭問題，他不爭取連任的原因還有多種說法，眾說紛紜，麥明詩表示：「咁高層次嘅嘢真係唔識呀。」
對於梁特首放棄參選下屆特首選舉，林作認為只是像董建華一樣搵個台階，「這就像董伯伯話自己腳痛所以辭職一樣，痛，都唔係第一天的事。實情，當然係阿爺覺得佢唔掂，棄保。搵個台階下，齊昕姐真係要忍辱負重。CY，也做了（即使是被迫的）人生最正確的決定，造福香港。」林作更指大部分評論員都要自打嘴巴，「剛剛看完李慧玲說葉劉只是Plan B，因為張曉明跟梁振英是綁在一起的。梁才最有機。Come on，以後真的不需要再看這些評論了。」
曾經支持梁振英的藝人黃秋生，早已撇下梁粉包袱，知悉梁振英無意連任，秋生即在Facebook專頁留下40個笑到喊的笑臉，並留言「今晚有慶典，好嘢！」
歐錦棠更開心到跳舞，並跟王宗堯拍片放上Facebook專頁，片中歐錦棠高呼「禱告有效架，佢(王宗堯)尋日仲話冇聖誕氣氛啦，依家有啦，開支酒慶祝。」而王宗堯則笑說昨日病病哋，依家乜事都冇。其後歐錦棠再接着說，「依家冇病啦，你哋乜病都冇，香港好番啦，邊個做都好，唔係佢做就得啦。你(梁振英)劑劑都出口術，呢劑你講咗唔好返轉頭，一路好走。」歐錦棠再留言「嘩！開心到！真係！人生滿希望！祝佢一路好走！」
至於一向敢言的何韻詩，則在Facebook分享了這段新聞，並留下三個感嘆號，未知是驚訝梁振英放棄參選，還是代表三枝香，就只有阿詩先知。