TVB再有節目變陣　《諸朋好友2》突延播由《你估我唔到》頂上

由崔建邦主持嘅《諸朋好友》，原本下星期一晚10點30分播出第二季，並由陳凱琳頂替張秀文擔任主持，接替《天天開運王》時段，Amigo並已在IG為節目宣傳：「有一班無所不談嘅好友嘉賓，包括張玉珊、蘇永康、錢嘉樂、錢小豪、方力申……」點知呢日又傳出有變。

3月16日崔建邦於IG貼出多張合照，預告新節目出街：「有好消息宣布！全新一輯《諸朋好友》將會由下星期一（22/3）開始，一連兩個星期，逢一至五晚上10:30pm播出！除咗有新主持陳凱琳強勢加盟，仲有一班無所不談嘅好友嘉賓，包括張玉珊、蘇永康、錢嘉樂、錢小豪、方力申……」點知相隔2日，Amigo就無奈表示節目要延播「啱啱收到最新通知，節目將會延期，一有最新時間即刻通知大家，到時記得支持呀！」TVB節目表同時段變咗由林盛斌（Bob）、張秀文主持的遊戲節目《你估我唔到》。