運動型視帝驚爆患遺傳病多年　背脊僵硬劇痛無法落床被公司當詐病

現年56歲的視帝馬德鐘一向是運動健將，身形高大健碩，堅持每天都做運動，入行前更做過警隊G4。不過近日他卻在影片中自爆，從十幾二十歲開始，已患遺傳病多年，最嚴重時更會完全不能動彈、落唔到床，甚至要叫救護車。

馬德鐘在自己的YouTube頻道拍片，以「我的長期疾病」為題，透露自己患「強直性脊椎炎」幾十年。他說自己少年時期經常打排球、游泳、玩田徑，一直都沒什麼不妥，至廿歲左右腰部常常很痛，他說：「瞓覺嘅時候成個腰，如果我保持姿勢唔郁嘅時候，好短時間背脊就會硬晒郁唔到，要撳住去轉身先起得返身，慢慢連企起身都痛，要等佢10分鐘，紓緩到可以郁得返。但係當你一長時間唔郁，佢又會硬咗。」

他說自己去求診時，醫生最初都難以診斷，只給他止痛藥，認為是他做運動勞損所致，不過20幾30歲時情況愈來愈嚴重，已不止背痛，呼吸時胸椎位置也會很痛，更無法呼吸。之後有位醫生建議他去檢查「B27基因」，指這基因會增加發炎性疾病的風險，診斷他可能是遺傳性的強直性脊椎炎，結果真的驗出有B27基因。馬德鐘說，照X光後發覺骨骼很多位置已融在一起，本應骨與骨之間有虛位，讓你可以郁動，但這個病卻令他的骨骼關節融合在一起，失去活動能力。

他解釋：「因為你有呢個基因，令到你身體入面自身嘅抵抗能力發生錯誤，本應佢係保護你，反而佢覺得你嘅關節有啲外來物去侵襲你，佢就去咗保護呢個關節，但係當我關節根本冇嘢侵襲我，只不過佢訊息錯亂，變咗佢係攻擊緊我唔同嘅關節，每一次都喺唔同地方出現，腰呀、手呀、膊頭呀、或者係腳呀，佢攻擊你嘅關節，令你關節久而久之失去咗活動能力。」

馬德鐘說以前在G4特警訓練時，經常都病發，就是無緣無故痛得很要命，背脊僵直無法郁動，卻被誤會詐病。他說：「阿Sir又唔知你咩事，你又冇撞親，冇嘢，好多時候以為你扮嘢、扮病，後尾Check到有呢個基因突變喺度就知道係咩事，點解跑跑下步突然間冇扭親，哎呀，好痛，痛到郁唔到，或者瞓咗嘅時候起唔到身。我試過曾經喺屋企瞓覺，瞓咗之後一醒，係完全落唔到床，成個背脊硬咗郁唔到，最終要叫十字車去醫院。」

馬德鐘表示，自己公開這個病，是想呼籲大家有類似病徵時可盡早發現，有辦法制止。他當日病發時未有方法根治，不過他從飲食著手，由無肉不歡愛飲酒，到堅持食素，炎症發作次數已大大減少，相信對病情有幫助。他透露，醫生曾說大約50歲後就不會再惡化，但他覺得未必是，有時久不久也會復發，只是發病率少了。不過今時今日其實已有方法去紓緩，他謂：「醫生同我講可以打啲生物製劑保護返你嘅關節，點解要保護返，如果我哋唔去保護佢，佢繼續不停攻擊你嘅關節，譬如攻擊我呢個手嘅關節，攻擊得多可能會硬化咗，或者新增咗啲骨出嚟令你長期都唔會拗得返直，所以未算好攻擊你關節嘅情況之下，如果打生物製劑保護咗佢，就避免佢去強力攻擊你嘅關節，令到有啲不可逆轉嘅情況發生。」