李珊珊近日復出，積極經營自己網台「三坐山」，近日她邀請圈中好友陶大宇受訪，二人因合作《靈異偵輯檔案》結緣，大宇稱珊珊為合作過之中「最爛玩女拍檔」，又大爆當年二人去飲酒猜枚，結果搞到成床血，大宇直言：「你爭啲搞到我死！」

兩人在訪問中講起飲酒，大宇說：「我真係考你一樣嘢，你記唔記得喺某一年某一個gathering裡面，你爭啲搞到我死！唔係話『你真係作死！』嗰啲，係真係死嗰啲！你直頭見唔到我，消失喺呢個世界。」他透露當時滿床是血，他以為是自己嘔完，珊珊笑言：「係玩得瘋狂咗少少嘅。」

大宇憶述當時情況，他與珊珊去酒局，兩人組隊與其他人猜枚，「我哋呢邊輸多啲，但係我唔想你飲咁多，我就下下都幫你飲，係飲紅酒，嗰時係一杯！一輸飲一杯！紅酒點可以一杯杯咁飲？咁啲酒都幾靚嘅，咁就唔好蝕底。」

他指自己當時飲飲吓就失去知覺、斷了片，也不知自己是如何回家的，而一擘大眼眼前的景象相當駭人，家中驚現血路，如像拍戲場景一樣。他說：「喺張床度，後尾枕點解咁濕嘅？原來全部血嚟㗎！我一起身好似兇案現場，差唔多去到你會跟住條血路走，門口又有血……」他沿著血路走，追溯到源頭在廁所，並續說：「嗰時我仲有酒氣，我第一時間乜嘢都唔好諗，跌穿咗個頭，第一時間去醫院聯針。嗰條血路我自己懷疑，夜晚我去洗手間，斷咗片，係撼穿咗自己唔知，跟住行返去睡房度瞓，條血路慢慢滴、慢慢滴，滴返去睡房，因為跌穿咗你又唔去止血，佢咪成晚流，死㗎！」自此之後，大宇坦言受了教訓，這廿幾年間就算飲酒，都會適可而止，以免再發生流血事件。

不過大宇之後亦試過再穿頭，拍《靈異》劇時，他與珊珊一場被爆樽的戲，因特約演員用錯位，將道具糖膠玻璃樽扑穿了大宇頭部，馬上濺血，珊珊見狀都嚇得魂飛魄散。完成直播後，兩人爭取重聚時間，大宇讚珊珊狀態很好，珊珊又多謝大宇兩脇插刀。大宇稱：「已有十多年冇見，有睇最近報道，覺得珊珊好叻、好勇敢、生命力好強，希望佢可以一直保持良好心態去面對一切。」

至於珊珊則稱節目從未想過要請演藝界朋友做嘉賓,但近日靈感到便想起大宇，認為他是一個自己「安全區」的朋友，所以便鼓起勇氣搵大宇撐場，結果節目出街後反應激烈，收看人數更大破紀錄！珊珊翌日在社交平台出post多謝大宇，她說：「大宇係我安全區內嘅朋友，唔使擔心任何嘢，今次有佢幫手，令我開咗一個好好嘅頭，今次再同大宇傾偈，覺得好開心，佢性格更比以前豁達，以前嘅堅持變得而家識轉念，佢嘅笑聲真係令我好治愈！」