游嘉欣昨晚（17/1）現身電視城出席《慈善星輝仁濟夜》節目直播，對於被爆在拍攝無綫（TVB）綜藝節目《尋歡作樂的姐姐》期間因頻頻NG，焫㷫了吳若希及戴祖儀，慘遭二人排斥，連吃飯都被孤立，疑在不堪壓力下淚崩當場的傳聞，游嘉欣在接受《香港01》訪問時就否認不和。

游嘉欣表示：「其實我哋三個拍攝都開心嘅，當然一開始就要適應節奏，我自己係一個比較慢嘅人，轉數唔係特別快，佢哋兩位就係超級快。（係咪頻頻NG？）咁真係冇嘅，因為我哋係爆肚嘅，當然入面我就覺得自己做得衰，覺得自己轉數咁慢，所以就畀咗壓力自己。」

提到吳若希指監製現身指住人問「吳若希、戴祖儀係咪蝦佢』一事，游嘉欣就表示：「我諗佢落嚟係睇我哋拍攝進度去到邊，睇我哋有咩可以改進。（點解會傳不和？）可能當刻壓力有啲大，然後我覺得做完嗰個嘢之後，覺得傷心難過，同佢哋講講吓嘢不禁咁流咗一兩滴眼淚，純粹係自己表現差，同佢哋講之後就釋放咗出嚟。（傳佢哋兩個孤立你？）咁當然放咗工就自由活動啦，我想按摩，而佢哋想整甲，就係咁我就冇參與。」