《愛．回家之開心速遞》又冇馬家　剩劉丹霸氣回歸：要添食再添食

《愛．回家之開心速遞》最終人腳終於揭盅了，劉丹、單立文、湯盈盈、羅樂林及呂慧儀等人今日就出席造型記者會。不少人都會關心新一輯處境劇有甚麼特別？監製羅鎮岳就表示：「處境劇都係陪住大家食飯，今次會加入靈異元素，但總之成件事係開心嘅！」劇集將於2月20日播出，預計會拍180集。此時丹爺出聲：「多數有親我喺度，就唔止呢個數嘅，一定會添食再添食嘅！」真係超有霸氣呀。

事後問到丹爺，今次馬家得返自己一個單拖，佢就話無辦法：「始終大家各自都有嘢做，馬家齊唔到人，我都會尊重公司決定嘅。加上拍處境劇一定會遇到唔同嘅人，幾年前見到羅天宇、蔣家旻，都唔識佢哋㗎，今次都一樣。」丹爺就話今次有8成人都未合作過，雖然驚驚哋，但都好期待合作。

不過新劇馬家無法團圓，都有其他方法呈現大家眼前，原來馬家已經拍緊飲食節目，就好似《一屋老友去旅行》 咁，一共有13集，目前已經拍了頭兩集。丹爺就話：「嘩，有一日拍到夜晚食唔到嘢，由朝食到晚，真係不得了。」既然齊人拍到飲食節目，點解唔開套劇？丹爺解畫：「其實唔係集集齊人㗎，我拍住先，之後就交畀佢哋啦。之後會唔會一齊拍劇，等公司安排啦。」

至於新加入的呂慧儀最開心就是拍處境劇時間相對穩定，不用太擔心無時間照顧囝囝。而且可以同單立文豹哥一齊拍劇，她覺得拍劇過程必定會很開心。