紋身人士全身圖案花綠綠，紋身紋上癮早已不是新鮮事，而且紋什麼圖案，紋在身上邊個位置，也是個人自由，其他人亦不能說三道四。不過近日一條紋身師動針的短片，不但在網上瘋傳，而且更被狂鬧不人道，皆因被紋身的對象，原來是一隻貓咪「Demon」。

Demon主人是俄羅斯紋身師亞歷山大，短片所見亞歷山大本人手臂已有大片紋身，亦即刺青術語「炸手」，據講他身上有不下10個紋身，而今次竟然將目標放在飼養的Demon身上，為免貓咪四圍郁，更幫其全身麻醉，跟着紋上美女、香煙、酒、啤牌及監獄共五個圖案，而動針過程見貓咪仿如死去，任人魚肉，而短片在愛貓人士群組瘋傳，隨即惹來一連串負評，呼籲該名主人不要再幫貓咪紋身，而且無端幫貓咪全身麻醉，隨時會影響寵物的心臟健康。

圈中出名的貓奴馬貫東，原來亦有看過該段貓咪紋身短片，他接受《香港01》記者訪問，語氣相當憤怒，「我有睇過條片，覺得好唔尊重隻貓，貓根本係唔會想紋身，或者咁講邊有動物會想紋身？只有人先至會紋。我覺得係虐待緊隻貓。」愛貓人士固然說紋身師不對，但亦有網民表示紋身是潮流，只是幫愛貓扮靚？馬貫東表示「我唔會咁樣扮靚囉，當然幫隻貓剪甲、沖涼就一定會。」

馬貫東講得如此肉緊，又戥貓咪心痛，皆因他也有一隻白色愛貓「衰仔」，不時將愛貓「肉照」上載到Instagram，他表示「都養咗一年零5個月，係第一次養，在朋友處帶回來的。我本身諗養貓都諗咗8年，之前行過寵物店，發覺自己對貓原來有敏感，接觸到會流鼻水、眼水，但係對住衰仔就無，可能係緣分，所以咪帶咗佢返屋企。」馬貫東每次拍劇回家，例必被「衰仔」纏住，「佢最鍾意繑住我手臂，如果避開唔俾，佢就會不停叫，要你屈服為止。」

無綫劇集《愛．回家》及《一屋老友記》，也加入了貓咪到劇內，若然監製開口借貓拍劇，馬貫東又接受嗎？他笑言：「之前都以為ok，可以俾佢拍劇，但試過一次帶佢出街睇醫生，衰仔即時扯蝦，而且心跳得好快，所以唔俾佢拍劇啦。」一眾貓奴跟馬貫東一樣對「主子」鬧都不捨得鬧，但見到該名紋身師「炸貓」，當然是萬分心痛，希望貓咪Demon不用再受皮肉之苦。