鄧兆尊回應新歡陳小姐疑有喜　遭《皆大歡喜》老友爆有人餵飯

經典劇《皆大歡喜》的一班演員鄧兆尊、阮兆祥、陳彥行和車婉婉齊齊到電視城錄影薛家燕有份主持的新節目《麻雀鬥室三決一》，勾起不少大家的回憶。他們接受TVB《娛樂新聞台》時，提到鄧兆尊新歡陳小姐近日被影到肚凸凸疑似有喜，眾人都齊聲恭喜他，但鄧兆尊就尷尬稱：「唔好恭喜我住啦，打埋（麻雀）先啦！」

雖然鄧兆尊口密，但家燕姐即在旁搶先爆：「佢有喜事吖嘛，真係戥佢開心呀！」陳彥行亦加把口：「佢成日都有喜事㗎啦！」車婉婉亦唔執輸：「佢日日都冚冚聲，我哋好難知道邊日先係正式有喜事！」之後，家燕姐更爆出鄧兆尊在錄影期間有人服侍，相當幸福：「我都覺得成日都有喜事，有時拍拍吓嘢有人會拎住袋嘢入嚟畀兆尊，一陣又拎啲茶入嚟，我就『嘩』一聲，乜咁好服侍嘅！」車婉婉再接力：「頭先喺廠出面有人餵飯佢食，真係感到好溫暖。」阮兆祥亦加入戰團，笑言兆尊在節目中打麻雀勝算高：「因為佢屋企唔使搵腳，隨時都可以齊人開枱。」訪問過程相當搞笑。

點撃下圖睇鄧兆尊幾風騷：

鄧兆尊多年來一直被封為「現代韋小寶」，享盡齊人之福。即使與舊三奶Claire分手，即有新歡陳小姐補上，他更曾大方分享齊人之道，更稱對3位女友都一視同仁。