愛回家丨張景淳愁爆宣布暫別劇組？　「龔燁會休息一段時間」

呂慧儀同張景淳喺《愛·回家之開心速遞》嘅「龔水戀」近日終於修成正果，「龔水黨」粉絲們更為二人斥巨資做應援祝賀，而二位主角日前亦特意安排60多位粉絲齊齊見證他們大婚，場面熱鬧。不過，正當唔少觀眾期待「龔水」會有愛情結晶品之際，張景淳日前喺IG直播時，突然宣布龔燁將會暫別劇組，令唔少粉絲感到十分錯愕！

張景淳日前深夜開live時，唔少粉絲都恭喜「龔水」大婚，不過，當有人問到故事會否發展到生BB時，張景淳沉思數秒後，以英文回答：「probably not(大概唔會)……同埋龔燁遲少少會有一段時間休息……」之後有人問三月會唔會有龔燁的戲份，張景淳就話「應該唔會有……希望……希望可以快啲又見返。」

有fans對於「龔燁」嘅離開大感不捨，並指張景淳看似十分傷心，張景淳以英文表示：「我知道你哋好多人會好傷心，包括我自己，我希望一切都會得到解決，同埋盡快返嚟。亦希望每一位都可以重新得到快樂，包括我自己。」雖然直播長達一個多小時，但張景淳未有交代離開《愛·回家之開心速遞》嘅原因，而當被問到幾時重返劇組時，佢都只係話「唔知道」，語帶無奈。其實早前有傳劇組因出現兩大「遲到王」而令高層曾勵珍（珍姐）十分憤怒，最後更直衝錄影廠鬧訓話。被指係「遲到王」張景淳由始至終都未有回應過，至於另一被傳係「遲到王」嘅林淑敏，其「老公」許家傑就以人格擔保護航。

對於暫別劇組一事，張景淳接受《香港01》訪問時表示只係誤會一場，他說:「係有fans問到今年情人節期間的劇情，希望有龔水的情人節主線。我回應時指暫時在已收到2月的劇情中，會在農曆新年的情節有主線，但情人節和目前收到的劇本裡暫時未有之後的主線集數，可能要休息一陣，希望他們耐心等候。」他之後更強調沒有調離，自己依然會留在劇組。其後，他再以短訊補充表示自己睇漏分場，並謂2月一樣有戲份。