【開心速遞】蘇韻姿右頸生腫瘤  請假11天急割 :已經好好運!

撰文:
最後更新日期:

在電視上都見到腫瘤。(網上截圖)

蘇韻姿右邊腮骨生良性瘤,雖然切除了,但留下1吋疤痕,手術後她亦用手蓋着右邊面自拍,答謝公司及家人支持。(網上圖片)

未割腫瘤前,蘇韻姿右邊面有少少腫漲,但其實細心留意先見到。(網上截圖)

《開心速遞》播了將近1個月,率先爆紅了劇中做呂慧儀胞妹的紅衫魚(蘇韻姿飾),網友讚她演技自然又靚。近幾集就發現蘇韻姿Andrea右邊腮骨近頸位置好似腫腫地,原來真係有個腫瘤呀!

蘇韻姿最近做了一個切除腫瘤手術,還留下了一吋疤痕,她說:「𠵱家切除咗當然無事啦,但醫生開頭都擔心嗰腫瘤會唔會變,都叫我快啲攞出嚟化驗,咁好彩化驗咗都冇事,(會唔會有疤痕?)咁女仔之家,最好梗係微創手術啦,無疤啦,但咁啱呢個位做唔到微創,咁但係醫生話都係要做㗎喇,條疤大約一吋左右,醫生就話𠵱家覺眼少少,但遲啲退咗少少,就會望落去似頸紋。我唔係太擔心,其實我已經好好運,及早發現又係良性瘤,始終健康最緊要!」

放了11天病假,蘇韻姿好希望復工,好想見劇中的家人。

為咗切除這個良性瘤,紅衫魚請了11日假,明天(15日)就會為《開心速遞》開工,她說:「進度理想啦,我又好乖戒哂口,蝦、蟹、蛋啦,我好多謝屋企人,特別公司啦,因為我新人,又發生呢啲事,個個都冇怪責我,反而個個都令我好安心。」健康最重要呀!

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。