王祖藍否認同女高層鬥不和拉隊走人：男人唔講呢啲嘢
撰文：吳子生
出版：更新：
王祖藍否認同女高層鬥不和拉隊走人。（梁碧玲攝）
王祖藍今晚（28/7）現身電視城出席無綫綜藝節目《開心無敵掌門人》錄影。對於被指有指因為鍾嘉欣輸掉視后，而跟無綫兩位女高層曾勵珍及樂易玲爆不和，事後感意興闌珊招兵拉隊北上另謀發展。王祖藍表示絕無此事：「其實如果我同TVB關係唔好就唔會返嚟啦，而且志偉哥（曾志偉）係TVB最大嗰個，同佢Ok我咪Ok囉。（同高層有拗撬？）我哋男人唔講呢啲嘢。（咁即係話男人唔同女人鬥？）咁又唔係，嗰個都係靚女，嗰個啲高層都係靚女。」
王祖藍透露舉家搬往上海居住。（梁碧玲攝）
另外又被指不滿J2創意總監C君，王祖藍表示：「呢單嘢直頭亂咁噏。事後我同C君都聯絡，都覺得樹大招風。（話你意興闌珊拉隊走人？）其實公司要處理內地嘅工作，我都要隨時服務總經理。（是否全家搬上長沙？）唔係，咁啱嗰3月拍《聲生不息》啫，所以喺長沙度住一排。而我哋搬咗去上海為居住基地，小朋友9月就會開學。」