72歲黎彼得病癒開工 堅拒重返無綫拍戲：搵到都唔夠俾醫藥費
撰文：吳子生
出版：更新：
黎彼得精精神飽滿。（葉志明攝）
無綫資深演員黎彼得（Peter）早前因入院做「通波仔」手術後，經濟出現拮据，並曾嘗試致電無綫高層珍姐（曾勵珍）求助但不獲理會。但幸得大劉(劉鑾雄)資助手術費及生活費，又多得契仔黃宗澤(Bosco)出手接濟，才度過難關。
黎彼得今日為劇集開工。（葉志明攝）
Peter今日（17/11）現身土瓜灣出席MakerVille原創劇《極度俏朗君》拜神儀式時，就事件接受《香港01》訪問時說：「我而家同無綫仲有一年合約，不過藝員部話我係兼職，所以可以兩邊走，出院到而家佢哋都冇搵過我開工。（珍姐有冇聯絡過你？）都冇，一個電話都冇。（有否覺得心灰意冷？）都冇所所謂啦，都係你情我願啫。（覺得人情冷暖！）人情不嬲都係人情冷暖，由佢啦，自己暖咪得囉，唔使理佢。（TVB搵你返去拍劇拍唔拍？）sorry，千祈唔好。（點解？）又係兩組咁捱夜，加上而家年幾大喇，嗰啲錢唔係我去搵啦，搵到都唔夠俾醫藥費。（相比呢度拍係咪好啲？）呢度每日一組，冇咁辛苦。（獲大劉出手幫助！）係佢呀，不過佢話唔好提，咁所以少啲講。佢個人係比較低調。」