楊盼盼嫁女過大禮冇龍鳳鈪一樣開心　滿意準女婿：多謝接收我個女

64歲的楊盼盼將榮升做外母！楊盼盼於80年代經常在TVB台慶或《歡樂滿東華》作高難度的特技表演，多年來獨力養大女兒楊慈悅（Jessica），愛女將於明年1月11日與拍拖15年、同為時裝品牌設計師的男友尹國豪（Steve）拉埋天窗。

昨日（19日）楊盼盼在Facebook分享過大禮影片，全程由女兒負責拍攝，見到Jessica的未婚夫Steve依照傳統，親自到女家進行過大禮儀式，不過是非一般的傳統聘禮，楊盼盼寫着：「今日過大禮3, 2, 1 Action！非傳統新時代儀式」。

楊盼盼準備將聘禮「開箱」時笑到見牙唔見眼，雖然唔見有龍鳳鈪等金器，但有囍餅、唐餅外，還有巨型蘋果、提子、油、鹽、冬菇、抹茶蕎麥麵、日本珍珠米等，她邊拆箱邊數笑說：「包羅萬有，珍珠米，我最鍾意食，豐衣足食，仲有雲耳、冬菇，樣樣都有，幾好。」之後她食雞蛋及湯丸，並向鏡頭說：「成雙成對，入面有紅豆、糖蓮子、蓮子、紅棗、龍眼、百合。」

之後楊盼盼拿着封大利是給未來女婿作回禮，笑說：「多謝你！見到禮物有8盒，好有心，心係最難買，我個女交畀你喇，你要照顧我個女呀，好好地愛護佢，唔理將來點樣，兩個人共患難，一定要好，健康、快樂、幸福。」Steve留心聽住未來外母的說話，不斷點點頭，接過利是後，楊盼盼打趣說：「唔好嫌我細呀！多謝你接收我個女呀！哈哈哈！」完成儀式後，楊盼盼坐低飲杯茶食件蛋糕，開心表示：「今日算係人生之中最美好嘅一日！」而盼盼姐又準備了紅菜頭湯及餃子，讓未來女婿試下其手勢。

Jessica接受《香港01》訪問，透露媽媽楊盼盼和未來奶奶都各送一對龍鳳鈪，她說：「我哋年輕人覺得金器冇乜用途，但未來奶奶都好有心，送咗一對佢結婚時收到嘅龍鳳鈪俾我哋。而我媽咪又好錫我，俾我自己揀鍾意嘅金器同珠寶首飾。因為最初佢同過我去揀龍鳳鈪，款式都係比較新穎，但最後睇睇下我想揀一啲平時都帶到嘅首飾，所以我提議自己揀，佢俾錢😂。」