48歲向海嵐升呢做老闆娘瞓身力谷品牌 反人體工學Sell健康性感

撰文:陳芷穎
出版:更新:

凍齡有術的向海嵐(Anne)早前入股保健產品,由星級代言人「升呢」兼任老闆娘。日前,Anne以一襲低胸長裙為產品拍攝廣告,期間更度身訂做多個拗腰、曲腿等高難度「甫士」,務求展現「不一樣」的性感優雅。

向海嵐由保健產品代言人「升呢」兼任老闆娘。

今次廣告拍攝,Anne既出錢又出力,她說:「擺咗好多心機喺今次拍攝中,由度橋、造型、硬照設計,到甫士上都有一齊參與研究,想出嚟效果同其他品牌『不一樣』,亦希望見到一個『不一樣』的向海嵐,然後就記得產品。」拍攝期間,Anne擺出多個優美的高難度「甫士」,就連Anne亦笑指這些「甫士」跟人體工學相反:「好多人唔知,影相啲甫士唔係正常人可以擺到,可能腳喺呢邊,個身喺嗰邊,同人體工學係相反,但最緊要出嚟效果靚,拍攝之前,我用咗兩星期練習擺甫士,所以先做到咁多高難度動作。」

今次廣告拍攝,Anne既出錢又出力。

花三星期Keep Fit

廣告中,Anne盡顯性感高貴,為以最佳狀態示人,Anne花了三星期Keep Fit,她謂:「之前過咗自己生日月,再加上有好朋友外國返嚟,差不多連續兩個月不停咁食,短短時間重咗8磅,為咗今日拍攝,事前努力Keep咗三星期,食少啲嘢、勤做運動,因為知道今次拍攝會見到手臂、心口。」Keep Fit過程中有否遇上困難?Anne笑言幸好自己有個「優勢」,能夠「一白遮三醜」,她表示:「平時覺得自己係呃到人,對我嚟講個個部位都好難Keep,特別手臂、肚、腰等,但知道自己優勢係對腳見得人,每次只要着短褲或短裙,大家都會覺得我好瘦,所以就算肥咗好多,可能大家未必睇到,但我自己會知。」

為以最佳狀態示人,Anne花了三星期Keep Fit。

提到「升呢」做老闆娘,Anne直言不時要計成本及效益,坦言有壓力。問到她可有將產品介紹身邊人?Anne不諱言:「經常都介紹畀朋友,自己對產品好有信心,好嘢係要同大家分享,產品得到加拿大認證先可以喺當地發售,其實巿面上有好多保健品,但要食落肚,一定要小心選擇,適合自己同埋要有信心保證。」

點擊睇更多拍攝花絮: