谷婭溦爆去年內地做婦科手術　獲曾志偉搭路安排：真係似爸爸一樣

谷婭溦與音樂人劉易昇合資八位數於灣仔成立的音樂學院，日前喺開幕儀式上，谷婭溦提到「爸爸」時一度激動落淚。不過呢位「爸爸」並非姓谷，而係姓曾。「曾生係每一次我有需要、我搵佢嘅時候，佢永遠都OK，包括我喺內地嘅時候，佢話『你有咩要幫助、或者想我幫你嘅時候，都可以同我講』包括我上年喺內地要做手術，佢幫我安排晒所有嘢，所以好多謝你。」無錯，呢位曾生就係無綫總經理曾志偉。

谷婭溦其後接受娛樂台訪問時，提到「當你最唔舒服、身體狀況最差時，有位前輩係咁話幫你安排晒所有嘢，而嗰時我同佢唔太熟。佢畀好多支持我，我覺得真係好似爸爸一樣。」谷婭溦又話去年公司幫佢喺內地安排咗工作，但因為唔舒服，於是就向曾生解釋，其後獲曾生安排做手術。「係婦科嘢，曾生之後幫我搵到港大醫生，真係好感恩。」一提到「爸爸」嘅恩情，谷婭溦又再眼濕濕，足見曾生真係幫佢唔少。

點擊睇谷婭溦閨房及更多靚相：