林作母親王莉妮今慶70歲大壽　與裕美破冰同框：嚟一個大團圓

林作母親王莉妮今日（4/8）於灣仔設宴慶祝70歲大壽，兒子林作和女友裕美亦有現身送花祝賀。林作在接受《香港01》訪問時表示：「其實大家今日見到我哋三個人一齊同框，完全係多得我之前整親隻眼瞓咗醫院，阿媽就見到女朋友裕美喺醫院度照顧我，令到我阿媽佢好感動，叫做香港都有人可以睇住我，所以佢非常安樂就咁探咗我10分鐘之後就走咗，佢見到有得卸膊，我有人湊住，佢咪多謝囉。」

王莉妮接著說：「我見到佢咁照顧住佢，我係好開心，因為本身我係有啲嘢我係做唔到，例如我個仔上半身我可以幫，但佢下半身我就幫唔到。不過我都係感動嘅，呢句說話係發自內心嘅，咁所以就趁住生日就嚟一個大團圓。」林作反駁說：「佢不嬲都幫緊啦，你又唔使等咁耐先多謝佢嘅。」被問到是否已經接受裕美？王莉妮笑說：「呢個下回分解。」被問到是否有信心同林作媽咪嘅關係愈來愈好？裕美表示：「我會努力去照顧佢，同埋佢個仔，如果佢有需要嘅話，我一定會幫手。」