45歲亞姐季軍東大門親自入貨靚樣激似韓妹　帶貨直播勁賺6位數

藝人姚嘉妮2006年與林祖輝結婚，婚後育有一對仔女，家庭生活美滿。榮升人妻人母後，姚嘉妮依然活躍於幕前，近年加入帶貨直播潮流發展得有聲有色，更試過在首爾連續七日開足近30場海外直播，每場吸引近千人睇，估計總銷售額超過10萬港元，相當犀利。

身為女強人的姚嘉妮對生意十分上心，近日被野生捕獲在韓國東大門親自選購衣物。從網友拍下的片段可見，姚嘉妮在店內專心地揀衫，攞住一件衫睇完又睇，更除下羽絨方便活動，相當用心。而姚嘉妮神態自若，不用店員介紹自己揀貨，熟門熟路。

而姚嘉妮戴上Cap帽，穿上背心毛毛外套及棉褲，現年45歲的她絲毫沒有發福，保養得宜，無濾鏡下皮膚白滑，遠睇激似韓妹，相當靚女。