香港著名堪輿學家麥玲玲（玲玲姐）今日（8/1）現身西貢出席無綫新劇《戀上西沙》開鏡拜神儀式。玲玲姐透露今次在劇中飾演炎明熹的姑媽，興奮表示過足戲癮：「除咗睇風水之外，其實我都好鍾意演戲，因為可以做唔同嘅角色，又可以同一大班嘅演員合作，過程係好開心又好好玩。而早前葉念琛都開口讚我演戲有進，加上又見到佘詩曼喺《新聞女王》做得咁好，令我覺得演戲真係唔容易。」

玲玲姐續指為了今次的角色造型，特意自掏添新服飾：「原本佢哋為我準備咗造型服裝畀我，但因為有事唔夠時間去搞個造型，監製林肯就吩咐落，唔要紅色同粉紅色嘅衫，我心諗我全個衣櫃都係紅色衫同粉紅色衫，變咗我要搵一啲色彩豐富，但又唔係係紅色同粉紅色嘅嘢，咁我就自己走咗去搵，最終買咗5套衫之後，跟住林上肯就同我呢個角色係一個好慳儉嘅寡母婆，講明我只係肯使錢喺個仔度啫，講明我自己買啲衫千祈唔好買咁貴喎。嗰刻我都打咗個突，我同佢講我已經買咗。我到而家都唔知佢收唔收價，唯有一陣同佢溝通吓，睇吓佢點。」