視帝馬國明與湯洛雯（靚湯）去年12月在泰國蘇梅島舉行婚禮，成為一時佳話。前日（13日）是馬明的50歲生日，昨日（14日）又適逢情人節，靚湯就親手整蛋糕慶祝老公生日兼情人節，她更拍片記錄整個過程，並寫道：「Long time no bakeeee❣️時間太緊迫，簡單咗啲，不過物輕情義重，請笑納🤣Happy birthday❤️」而馬明隨即回覆：「鍾意」，兩人相當甜蜜！

靚湯表示已經好耐未整過蛋糕，所以今次就特別炮製，希望為老公送上驚喜，見她整得有板有眼，非常熟手，好快就整好一個靚靚蛋糕，最後她還在蛋糕上插着「Love」的裝飾，相當有心思。最後兩人甜蜜合照，見馬明笑得咁開心，相信他婚後的第一個生日都過得好開心！

而片中的超大廚房亦引起網民關注，可見空間極大，設備齊全，窗外更可望到山景，環境清幽。據知馬明同靚湯的愛巢位於將軍澳，兩人在2022年就被爆已經同居，其後更被搬運公司不慎曝光愛巢，但馬明就表示不介意，表現大方。兩人的愛巢以白色牆身做主調，客廳擺放了白色梳化，整體感覺簡約又不失格調！