郭珮文（Juliana）今日（4/3）以嘉賓身份現身電視城出席無綫節目《Mayanne 小喇叭》宣傳造勢活動。Juliana受訪時表示：「其實今次上嚟係講好嘅身材會帶來啲咩煩惱，而對我嚟講買衫係我最大嘅煩惱，因為通常我都係啲彈性嘅衫着，但市面上好多衫嘅圍度同我係好唔啱，例如個胸啱，但條腰就唔啱，變咗我會被局限喺某一啲嘅衫度。（身材咁好，怕唔怕受注目禮？）其實都幾滿意自己嘅身材，人哋鍾意睇咪睇囉，但就唔好影響到我就得。」

被問到有好身形會否為自己帶來人緣運及工作量？Juliana表示：「我諗係有關係，記得以前細個嘅時候成身都係肉肉地成個波咁，但後尾瘦咗之後成個形出咗嚟之後，身邊嘅異性係多咗，尤其參加港姐之後更加多人關注我。（工作量都多咗！）應該都係，而我發覺IG post 我着得密實，係好少人讚，但當我着得少啲嘅時候，係直頭上埋新聞，啲like 又多，哇好正。（捉到流量密碼！）但啲人睇多咗就唔想睇啦，咁所以唯有適可而止。（怕唔怕被定形為性感女星？）如果暫時有咁嘅標籤都Ok嘅，但希望之後落嚟可以洗底。」