【29+1欣宜創業】大大塊被嘲肉酸「人如曲奇認識後會發現正嘢」

撰文:
最後更新日期:

從網店到實體店,藝人鄭欣宜以自家製的美式軟曲奇創業,最初兩年並沒有表露身份,而是化名J在網店經營。「初初好驚大家知道曲奇係我整嘅會唔鍾意,所以整完都係擺朋友嘅咖啡店寄賣,網店生意都是拜託工人姐姐送貨。」開始時,處於事業低潮的她只把製作曲奇當成聊以慰藉的興趣,慢慢,她把這愛好認真當成一回事。

「我覺得甜品和Shopping一樣,開心時可以令人滿足,不開心時用來發洩,就好似藥物一樣治療心情。」希望把快樂分享出去,便是欣宜開店的原因。

攝影:龔嘉盛

焙茶脆米曲奇($25)及棉花糖黑朱古力曲奇($25),前者茶味頗濃,沒那麼膩。

欣宜言談率真直接,早以習慣面對鏡頭的她,自言亦試過「緊張到唔敢望人嘅時候」。那次並不是在台上唱歌,而是第一次作為曲奇店代表,到某商場開會傾談短期合作的事,當時對方說了一句,令她印象深刻。

「你唔好以為自己係明星就會有人買你啲曲奇,某某明星即使成日落黎睇舖,而家都執咗!」
商場負責人

「其實當時我好嬲,係枱底握實拳頭,用力搣住自己大髀,屁股好似著火一樣!他拒絕唔係問題,我預咗會被人拒絕,但塊曲奇擺喺佢面前,佢食都無食過就咁講,我覺得係鄙視!」不過她那刻深吸一口氣,回答:「多謝提醒我要以食物為先。」

這個失敗的經驗,對欣宜來說反而更好,「之後我即刻聯絡其他商場,激勵我全力做嘢,我唔想三分鐘熱度,要做就要做到最好!」不想給人看不起,成為努力的動力。

欣宜希望更多人認識及喜歡吃美式軟曲奇。

+2
+2
+2

曲奇被嘲「肉酸」 欣宜指曲奇如人一樣正

近年很多甜品店都以五顏六色、卡通人物樣子的食物作招徠,欣宜則說:「我好怕色素,好假,所以曲奇唔會有粉紅色、紫色等等。」

「曾經有人話我啲曲奇好大塊、好肉酸,但我覺得我啲曲奇同我自己一樣,第一眼未必好似花一樣吸引人,但認識之後,就會係當中發現到啲正嘢!」

美式軟曲奇體積大,煙煙韌韌有嚼頭,與一般小巧香脆的英式曲奇不同,不少人第一次接觸,更以為濕潤較軟的口感是因為未熟透,猶覺怪異。正如《女神》的其中一句歌詞「標準的審美觀跟你碰撞  控訴你未符俗世眼光」。曲奇如人,各具特色,亦各有捧場客。

店舖供應的曲奇口味較特別,如配搭麥提莎、麥芽糖等。

因地獄式減肥才學整曲奇

欣宜自言16歲減肥時開始學整曲奇,問及當初是否想自製健康曲奇,她斬釘截鐵地答:「完全唔係!」她解釋,「當時地獄式減肥,我戒口戒得好厲害,那段時間最想食披薩和曲奇。我平日都無超級鍾意食,可能因為唔食得,慾望反而更加大。」不能吃,於是她便學習製作,望梅止渴。「OK!Fine!我不吃,整咗當食咗,當時先知原來整曲奇要用咁多牛油和糖,哈哈!」

欣宜憶起那段時間,自己嚴守減肥守則,一塊曲奇都沒偷吃,通通把自製曲奇送給朋友,看到大家喜歡吃得高興,那種滿足感,使她發覺製作曲奇和唱歌的共同點,「令到觀眾開心、拍手掌嘅滿足感,同我整完曲奇見到大家食得開心係一樣!」

炸曲奇魚蛋配燒棉花糖軟雪糕($50),造型貌似魚蛋,別具新意。

「炸曲奇魚蛋」連繫兩個家

光是售賣美式軟曲奇並不夠特別,於是欣宜和拍檔便構思到把曲奇搓圓、油炸、再以竹籤串起,製成炸曲奇魚蛋,既保留曲奇的味道,亦有一點對香港地道美食的致敬。「雖然我唔喺香港讀書,但好鍾意呢個地方,亦成為咗自己嘅家」,這款食物的靈感就是來自她在北美洲和香港兩地的童年美食。

「香港人好得意,鍾意食甜品但又唔想食甜嘢!」欣宜笑指,加拿大連鎖咖啡店的軟曲奇雖然很好吃,不過非常之甜,「所以我都明白香港人點解食唔慣。」為此,店裏的軟曲奇比坊間的軟曲奇甜度低3分1,大部分曲奇亦用法國Valrhona 64%黑朱古力,以迎合香港人口味。

不少藝人都開曲奇店,欣宜坦言不怕競爭,認為百花齊放更加好。「我哋每日都會檢查產品質量,我相信只要我嘅產品好,客人就會繼續買。」這幾年,她已把香港當成第二個家,亦把曲奇店看待為另一門事業。

Homie Cookies and some other stuff
地址:銅鑼灣耀華街 3 號百樂中心 1 號地舖



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。