Apple Watch series 4 開箱上手玩！大芒更好睇、新功能好玩實用
前排Apple發布會主角當然是iPhone XS、XS Max以及XR吧，不過對於不少果迷而言Apple Watch series 4才是主菜！更大的屏幕、更快的效能，加上心電圖等健康功能等，對於喜歡運動的果迷而言，這一代Apple Watch series 4才是心目中最好的選擇。新錶雖然未正式出街，《香港01》就早一步將Apple Watch series 4金色不鏽鋼版入手，即刻開箱、以及2日實試使用評測介紹。
Apple Watch 4 開箱！
Apple Watch series 4終於再次推出稍矜貴的不鏽鋼錶殼版本，這一次入手的金色不鏽鋼錶殼配金色鋼織手環版本，比一般鋁金屬版本無論包裝及拎上手都比較矜貴一點。
開箱就會見到錶身同鋼織手環分開包裝，打開之後就會見到被絨袋包著的錶身，因為不鏽鋼錶殼較易被磨花，所以大家要小心使用（雖然都可以利用打磨的方式來回復光澤...）。盒內還有無線充電線以及火牛，同上代的配件幾乎一樣。接下來打開錶鍊包裝，同以往銀色以及太空灰的鋼織手環一樣重手，而金色看起來不太俗套，男女通殺。
大芒的誘惑
與iPhone同步手錶之後，啟動電源，看到其加大了近3成以上的屏幕就已經非常高興，上代42mm版本顯示屏幕只有740平方毫米，而今代44mm屏幕就大至977平方毫米，屏幕邊框更窄，可睇的範圍更廣闊，睇短訊、運動資訊、地圖等都好睇好多，單單這項進步就已經要加分！而處理器升級至S4第四代處理器，比起series 3的S3處理器效能強化2倍以上，在一般使用時已經感覺其爽快程度。例如新錶與舊版同時打開地圖讀取當時位置，AW4只需要2-3秒就讀取、定位完成，而AW3仍需要十多秒才可，效能提升令實際使用感覺更良好。
更貼心的運動提示
效能更強，早已預載WatchOS 5的Apple Watch series 4，功能比上代當然多很多，單單運動訓練功能就已經「翻倍」！體能訓練以往都已經十分實用，今代更加入更多新運動選擇，除了跑步、游水等設定外，如瑜伽、踏步機、遠足、划艇等，Apple Watch都可以因應手臂的擺幅、心跳資料等來感應計算以及紀錄運動量、消耗卡路里等。練跑時，更新增配速提示以及設定個人目標，感覺就好像有位運動教練跟身，雖然記者自己都不太成日運動，但這兩天使用「戶外步行」返工計算運動量，令自己運動的動力提高。
如果覺得一個人做運動好悶，但又好難約埋朋友一齊跑，新增同朋友挑戰功能就好好玩，可以隨時邀請好朋友分享運動數據，進行一個星期7日的比賽，同朋友鬥高分，勝利後可以獲取獎章，更有挑戰的理由吧！
跌倒感應功能
新Apple Watch除了後生仔運動用外，其實老人家都很合適，因為新錶內置跌倒感應功能，當手錶感應用家不自然的跌倒，而且一段時間趟在地上不動，便會自動啟動求救功能，隨時實用過平安鐘（當然Apple Watch要與iPhone連線中或LTE、WiFi連線時才可作求救）。
好玩新功能
WatchOS 5其中一項新增好的功能，就是新增了「對講機Walkie Talkie」功能，只需要雙方都已經有升級WatchOS 5的AW，便可以使用。只需要一即講，直接同朋友連繫。記者就試過在公司直接聯絡其他同事「出發食Lunch」，就認真方便快捷好玩。
而Siri功能又增強，更加實用，用家不再需要再叫「喂Siri」，一舉手即時向手錶說出指令便可，例如「我而家想跑步呀」（就會自動開跑步功能計算）、「打比xx」（即時致電給朋友）、「幫我記低聽日下午1點要開會」（自動開日曆記事）、「最近便利店喺邊度」（自動打開地圖及路線指示）...方便了很多。不過記者試過在比較嘈雜的地方難以呼出Siri，可能將來會否系統升級上有所改善。
心電圖何時可以用？
Apple Watch 4新一代光學心率感應器，除了可以感應即時心率資料外，更首次對應「心電圖」（ECG）功能，手指一篤錶冠30秒，就可以完成檢測。而且已經取得美國FDA認證，可以於醫療上使用，一般運動手錶的功能完全塵埃莫及。只可惜「心電圖」（ECG）功能需要當地醫療機構取得認證才可以使用，香港暫時未有。據小道消息指，香港Apple都已經向有關機構申請中，究竟何時可以有得用此功能？拭目以待吧。
電量比較
好多人想知今代Apple Watch電量有沒有進步，官方就指新錶與上代同樣連續使用18小時，換句說話亦即是要日日充電。不過，實測用了使用2天，如只是一般睇時間、看短訊及少量運動紀錄，電量實際能勉強夠使用2天。而如果全開運動紀錄、GPS同LTE功能，就可以用足5小時，比起上代只可以用4小時，都多了20%的使用時間，一般運動都夠用。不過其實記者最想Apple Watch可以連續使用3天以上，以便出外旅行時毋須再帶額外充電線那麼麻煩就好了。
更多Apple Watch series 4實測圖片（按下圖放大）
今代Apple Watch series 4無論功能外、外型上都煥然一新，更大屏幕、更多運動功能，而且又有埋Walkie Talkie好玩得來又實用的功能，如果用緊一、二代Apple Watch的用家絕對是值得升級的。不過如果一般人只是想用來紀錄運動，又不會用到心電圖等複雜功能，便宜近千多元的Apple Watch series 3（$2,199起）亦都是不錯的選擇。
《香港01》App，手機用戶，體驗更佳！好玩gadgets情報攻略及評測即時放送！
立即下載：https://hk01.app.link/xCr9HdE3vO