【特首選戰．博評】拜薯片現象研究：戲假情真，借位變真軍

揀lesser evil當然冇錯。但，其實真係冇人逼你揀的，你亦冇得揀。我唔明做乜咁多人當正自己endorse曾俊華一樣，特別係，好多當初明明話要真普選，唔肯袋住先。「政治現實係咁」？頂吖，831明明係同一班人話冇咁毒都係毒，唔可以「袋住先」，一粒老鼠屎都整衰成鍋粥唔要得。而家嚟同人講「政治現實」。香港人果然擅長失憶。

未變成深水埗親民大使前，睇法國電影飲咖啡嘅嗰個曾俊華，應該記得2002年法國總統大選。

法國大選　示範如何含淚投票

嗰場選舉原本悶到極，以為係當時總理若斯潘（Lionel Jospin），同尋求連任嘅總統希拉克（Jacques Chirac）之爭。 點知首輪投票，若斯潘被鎅票，爆冷下馬。將若斯潘踼走，入到次輪（亦係最後一輪）投票嘅，係極右國民陣線主席勒龐（Jean-Marie Le Pen）。

特朗普（Donald Trump）被譽為係勒龐進化版。可想而知，當年勒龐入到次輪嘅消息震動全歐洲。法國報紙頭條清一色係「令人作嘔」「國恥日」，連對面海英國首相府都隔空發功講「我哋會尊重法國人意願，但相信法國人會抵制極端主義」。

勒龐就係當年嘅大魔頭。希拉克，就係冇咁爛嘅橙，lesser evil。法國政壇前所未有咁團結， 由左至右大合唱聲討勒龐，齊齊呼籲選民放下成見，為法國着想，含淚投希拉克。

留意返， 即使殺入次輪都好，當年其實連勒龐嘅戰友都唔相信佢有勝算。但法國人認為希拉克唔止要贏，仲要大勝，先顯出法國對極右說不。所以，平時憎到希拉克死嘅，結果都含淚投票。投票前有人提議要掩面投票，要夾住個鼻，或者帶手套， 以顯示「含淚投」希拉克嘅厭惡。不過法例禁止咁樣表示投票意向，最後作罷。

支持還支持　使唔使捧上天？

呢排任何質疑曾俊華嘅聲音，都會畀網上主流攻擊。「你係咪想要林鄭／葉劉吖？」。（Sorry，實在冇乜人take 胡官 seriously）。

假設我哋做個假想實驗，當真係一人一票選特首，又一定要在曾俊華／林鄭／葉劉之間三選一，又冇得投廢票，一定要投票（你當有個頸圈，唔投票就會電你，電到你投為止啦）。我估好多人都會投曾俊華，我估我都應該會。所以，我主要唔係質疑曾俊華，係質疑佢部分fans。

我絕對明白，睇人有得玩，自己冇得玩，係相當唔好玩的。所以要科水眾籌刷存在感，以表示東區走廊我有份起。

咁三選一，曾俊華又「冇咁唔順眼」，又會「講人話」，「親民」，「形象好」，「風趣」（其實即係兩個字：公關）——以上種種我全無異議，問題係，有必要將佢捧上天嗎？

我當年就冇見法國人講希拉克講嘢風趣，代表法國核心價值之類。含淚投票嘅個個都知希拉克係仆街，不過「仆街都要投」，因為另一個更仆街，惟有掩住鼻忍住惡臭支持佢啦。

我以為呢個係我哋對待曾俊華嘅態度，點知唔係。原來好多人戲假情真，得閒得滯，借位變打真軍。呢排收到唔少朋友叫我去like曾俊華嘅社交網站，甚至叫我去課金。 真係有咁投入？

草民如你我　何必睇政綱

嫌2002法國太遠嘅，就講返2016年美國總統大選。我當然冇預到特朗普會勝出，但我的確有寫過，希拉里班支持者，以及一大班主流傳媒，在兩人辯論後紛紛自high，係咁話希拉莉「贏咗」，小學雞過細路仔踢波。特朗普拮中希拉莉要害就冇風度，「咁賤都講得出係咪男人嚟架」，希拉里拮中特朗普就講得好窒到條肥佬啞口無言。呢類嘅圍爐互讚，睇得多冇益。

而家講曾俊華着衫又好睇又識用Facebook講英文又好聽又識睇港產片又會去深水埗（就唔好提粟米斑塊同中產啦）嘅，都係同一回事。唔好忘記人哋美國真係有得投票喎。

好難怪曾俊華只愛做show，因為特首候選人政網真係唔多重要。最重要嘅issue只有一個，就係中港矛盾。搞得掂嘅，包你留芳百世。你見大家日日鬧嘅問題，90%以上都係嚟自中港矛盾。搞得掂嘅，剩低嗰10%都唔會有人再介意。但話咁易咩。拆得掂嘅，勁過促成以巴和談，應該可以拎諾貝爾和平獎。

其他咩各界希望特首候選人關注乜呀，留意乜呀，在我心中，都不過係attention seeking同利益交換。本質上同當年睇A Club啲讀者來信差不多，最好廿四小時播晒動畫就啱你心水。

在中港矛盾（或中港關係，if this make you feel better）上，曾俊華交張點嘅卷？當然係一張大路嘅卷。831，23條，背靠祖國，一帶一路，同港獨劃清界線。所以你話佢代表香港核心價值，我絕無異議。Smart ass 嘛，政綱畀你睇㗎咩？

其他政網，其實草民如我如你，真係唔使睇。原因好簡單，都冇票，睇嚟做乜？政綱提咗嘅唔做，奈得佢何？「下屆唔投佢」，扯，今屆你都唔投㗎啦。本來都無一物，何來票債票償？

（文章純屬作者意見，不代表香港01立場。）