叱咤2024丨陳卓賢還獎「約定」今晚見　張敬軒冧笑「來來來」

MIRROR成員陳卓賢（Ian）今年在 《2024年度叱咤樂壇流行榜頒獎典禮》大豐收，連奪奪男歌手金獎及創作人金獎，一身西裝骨骨的Ian拿着兩獎一臉凝重：「好耐冇試過心跳咁快，依家腦海一片空白，兩個獎份量好重。」

Ian攞住兩個具份量獎座。（影片截圖）

Ian逐一多謝公司、MIRROR兄弟，以及去年合作過的音樂人，當中特別多謝張敬軒，他說：「關於呢個男歌手獎係有個故事，剛才都有好多歌手朋友提起一個名，張敬軒先生。咁點解呢個男歌手獎會有一個故事，2022年嘅時候，張生拎咗男歌手金獎，應該冇記錯，然之後佢有一晚佢就打俾我，佢話『有啲嘢要俾你』，我吓有咩要俾我？跟住佢俾咗個佢嗰年攞個男歌手金獎俾我，佢就同我講『你擺喺屋企，我相信有一年你可以攞到男歌手金獎，攞到就俾返呢個獎俾我』，我今晚返去就即刻攞返俾你。」

台下的張敬軒目不轉睛、雙手緊握望住台上的Ian，隔空connect，一邊笑一邊拍手，聽到「攞到就俾返呢個獎俾我」特別興奮，兩手揮動示意「來來來」，未知今晚的「約定」會否開直播跟粉絲一齊分享。