《2024年度叱咤樂壇流行榜頒獎典禮》今晚在亞博舉行，52歲鄭秀文（Sammi）相隔24年再奪「我最喜歡女歌手金獎」，Sammi在觀眾席上邊唱《我們都是這樣長大的》邊行上台，這首正是2022年的至尊歌，全場歌手站起夾道歡迎兼影相，得獎可謂實至名歸！

穿上一件紅色西裝款外套的Sammi，直言太緊張，所以唱錯歌詞，「屋企練咗好多次，太緊張，多謝你哋。」Sammi拿着獎座笑說：「多謝大家，上一次攞呢個獎係2000年，24年前，呢度有啲人未出世，仲有啲人喺媽媽個肚度呀陰公。唔好意思，有少少長......我揀呢套衫，唔知大家記唔記得，呢件衫係2000年我攞我最喜愛女歌手時着嘅衫，雖然佢唔係最光鮮，但佢充滿住我對歌迷嘅情感，同對叱咤嘅情懷。」

Sammi直言曾考慮是否應該親自上台領獎，她哽咽地說：「冇企呢個頒獎台20幾年，好尷尬，格格不入，好懷疑....但另一個聲音同我講，叫我唔好太睇少音樂嘅力量，音樂能使人與人有更好嘅溝通，可以打破隔膜，係最好嘅語言，所以我好坦然企喺呢個舞台俾我榮譽，親身上台多謝投我一票嘅人，係你哋彰顯投票嘅意義同價值！」

Sammi謂多得自己帶著勇氣及堅持，也以此勉勵台下眾歌手，「我想同年青歌手講，希望你哋到我呢個年紀都可以企喺台上勉勵返啲年青歌手，香港樂壇先做到薪火相傳！」她特別感謝多年戰友、助手、經理人郭啟華及細佬等，但就沒有多謝老公許志安。最後Sammi更叫全場樂迷一齊大叫一次2025年叱咤樂壇我最喜愛的女歌手名字「鄭秀文」，掀起全晚高潮！