余文樂婚禮唱咩歌好？　將《還你門匙》改成《送你門匙》就Fit喇

又一男神封盤喇！36歲的余文樂與29歲台灣「皮帶大王」千金王棠云今日喺社交網站宣布拉埋天窗。各位圈中好友都紛紛送上祝福。
「余春嬌」楊千嬅表示：「我好開心因為志明終於結婚喇！呢個係春嬌衷心嘅祝賀，作為佢朋友我真係好開心，因為家庭係一個人生嘅新開始，亦都俾自己生活好大動力。同埋係新階段，希望志明同太太幸福，身體健康，快啲有小朋友，因為佢都好鍾意小朋友！希望佢哋永遠幸福快樂，好似王子公主咁！」
而「志明」余文樂都多謝各界祝福：「好多謝大家的祝福！很感恩和開心！終於進入人生另一階段！」

「張志明」余文樂終於成家立室是開心事，不過婚禮當中都唔可以播錯歌，猶其樂仔本身大部份歌都係「兵歌」、失戀歌，睇嚟樂仔都係播人哋嘅歌穩陣啲！依家即刻睇下樂仔要避開邊5首歌啦！

1.《春嬌救志明》粵語版

余春嬌救張志明　打救咗佢整個生命

第一首當要提「余春嬌打救張志明」啦！《春嬌》系列電影中，余文樂演活了大男孩張志明，到《春嬌救志明》樂仔更cosplay小雙俠求婚，相信不少觀眾睇到嗰幕都眼濕濕，覺得好感動。

問題嚟喇，點解首歌咁sweet都唔用得？因為呢首歌係屬於志明同春嬌，個個一聽到呢首就諗起余文樂同楊千嬅，搞到新娘子嬲嬲豬就唔好啦！或者樂仔現場唱一次「王棠云打救余文樂，打救咗佢整個生命」都可以諗下嘅！

2.《司機》

為何還未看開　不喜歡背人感慨　可以不愛
不用愛　就當喜歡給你差遣　原來還勝過被愛

眾所周知，樂仔係愛車之人，相信佢都好樂意做王棠云嘅專屬機，不過樂仔自己歌《司機》就唔係咁啱婚禮播喇，事關呢首係「兵歌」嚟㗎！歌詞相當直白，一句「只可將　別人伴侶　謢送往返」已經道出一切，最後下場「感激不講一句 也應該」真係幾sad。不過改成「只可將自己伴侶謢送往返」咁就啱晒數喇！

3.《還你門匙》

談情説愛就算輕易 如何話別誰又會知
好不過 相擁到 半熟時
還掉你那門匙 也出於好意

又一首sad歌，歌詞容易淺白，無非都係圍繞分手、冷戰、共對無言，去到最後「還掉你那門匙 也出於好意」，如果一對情侶走到呢一步真係……所以婚禮上千祈唔好唱呢首歌，或者將首歌改成「送你門匙」咁就開心好多喇！

4.《放心放手》

若放心　便放手　明日都可當好友　
無謂再 為我甘心的出醜​

相信大家睇到上面句歌詞都即刻諗到，《放心放手》又係一首講分手嘅歌，不過歌詞中似乎是嫌對方未夠成熟，像一個大哥哥「教訓」對方要找到自己的生活重心，不要勉強，不要作無謂的把戲嘗試挽回感情，免得把關係玩爛，連朋友都做唔返。歌詞「請你從今天　學會向上游」道出男生的心聲。都係嗰句，如果將歌名改成「放心牽手」就啱數喇！

5.《生還者》

不管已用幾年時間　一刻躲懶　情便永不返​

雖然《生還者》聽落好浪漫，歇斯底里花光氣力去爭取，去維持關係，但係如果一段關係行到呢一步又有咩謂呢？加上「不管已用幾年時間　一刻躲懶　情便永不返」及「如熱愛被我親手割爛　較沒有更慘」呢兩句都講到一段關係岌岌可危咁款，如果婚禮上面播真係唔多老黎。好似點改《生還者》都唔係咁啱數，不如都係搵番小鳳姐好啲喇！