張敬軒「降兩度」個唱終極加場今日開售 重現彩色座位表歌迷讚好
今時今日喺香港睇Show，真正係一票難求，睇下之前黃子華及五月天賣飛情況就略知一二。即使肯瞓街幾日排隊，最令粉絲心酸嘅係，公開發售時永遠都係絕望座位表，漆黑一片KEEP起大量門票作內部認購。張敬軒6月會以「降兩度（Gonlando）」身份於紅館開騷，呢日第三度公開發售，歌迷大讚：「彩色座位表重現，今次有希望啦﹗」
降兩度出山 張敬軒版《囍帖街》《可惜我是水瓶座》你Buy邊首？
【黃子華棟篤笑開賣】網上購票細則要睇清楚 撳爛F5原來係冇用
張敬軒今年演唱會搞搞新意思，用「降兩度（Gonlando）」身份開騷，第一次連續開六場個人演唱會第三度加場今日（5月15日）公開發售。睇返三次開售嘅座位表，可以話係大躍進﹗3月27日第一次公售，只得兩個角嘅$480、$280門票；5月3號加場開始有一整圈嘅藍色粉色，到今日個座位表簡直係一片光明，學軒仔留言俾網民話齋，今次「阿婆都要買到」呀！
新嘅演唱會海報亦同時見街，最sharp梗係條bling bling脷啦，拍攝時，軒仔「瀨」晒啲閃粉落條脷，呢個shot雖然影咗五、六次，但每次影完都要「𠺘」十幾次口，不過最好笑就係每次都要伸條脷出嚟影半分鐘，「呢個shot真係幾有難度，因為條脷要伸得好出，但又唔可以吞口水，試過幾次條脷hold得太耐而滴咗啲口水出嚟。」髮型方面，原來係向軒仔媽媽致敬，「因為我阿媽都整過呢個頭，顏色都係差唔多，係咪好潮？」
之前軒仔都講過，今次演唱會好抵睇，因為係一張飛可以睇到兩個演唱會：張敬軒同「降兩度（Gonlando）」。睇番網民嘅留言，原來好多人都想知「降兩度」究竟係邊樹人，趁今次終極加場，降兩度就透過軒仔回應，「我喺大溪地出世，祖籍意大利，再溝咗啲黑龍江、印度同長洲咁啦。」七國咁亂嘅喂？降兩度好無奈咁話：「上一代嘅嘢我真係唔知！」