Marf任澳洲小天王Ruel巡唱嘉賓驚喜落淚 透露COLLAR工作計劃

撰文:陳芷穎
出版:更新:

女團COLLAR成員Marf邱彥筒,昨晚(19日)為澳洲小天王Ruel 「4th Wall World Tour 」香港站擔任表演嘉賓,並合唱歌曲《SOMEONE ELSE’S PROBLEM》,首次跟外籍團隊合作,Marf直言既興奮又難以置信:「事緣我前日先知道Ruel嚟香港開騷,於是我問經理人可唔可以買到飛睇,點知下一個收到嘅訊息,反問我有冇興趣做今次嘉賓,當時我係開緊工,見到呢個訊息,忍唔住驚喜到落淚。」

Marf為澳洲小天王Ruel 「4th Wall World Tour 」香港站擔任表演嘉賓。

Marf絕對是Ruel的小粉絲!她早於4、5年前已留意Ruel的作品,最喜歡對方兩首歌曲《Face To Face》及《Painkiller》,Marf說:「好欣賞佢好盞鬼嘅idea,而我日常聽歌亦喜歡輕快歌曲,聽一啲令自己舒服同有動力嘅歌,Ruel嘅歌曲正正就是我鍾意嘅感覺。」作為小粉絲,難得見到偶像,Marf又會跟對方傾談甚麼?Marf笑說:「初次見面,佢畀我感覺好easy going,而我第一句就問佢會唔會Stay Behind HK,佢同我講佢都唔清楚,我知道佢好努力要繼續籌備佢嘅巡唱。」

Marf是Ruel的小粉絲,她早於4、5年前已留意Ruel的作品。

至於問到Marf何時再出單飛歌曲?她指COLLAR即將會有一連串的工作計劃,包括推出團歌、個人歌曲及不同活動,而她的個人歌曲亦籌備當中,歌曲類型以輕快為主,她表示:「想定立形象,畀人感覺到自己嘅能量。」

Marf為澳洲小天王Ruel巡唱香港站擔任嘉賓,既興奮又難以置信。