應付職場是非精「以德報怨」最具殺傷力:愈殷勤對方愈緊張

撰文:
最後更新日期:

應付是非精

雖然寫職場文章已經寫咗兩三年,但有一樣嘢我諗極都唔明,就係香港打工仔明明已經好忙,日日做到有返工無收工,但點解仲有咁多人有時間搞是非?無論大細Office,只要有人,就一定滿佈是非,究竟用是非做人情係咪真係會帶嚟益處?如果無著數,點解仲要繼續搞是非?無奈地,就係有好多人鐘意做損人不利己嘅事。如果你身邊都有小人、是非精,你又點樣應對?

作者:詩寧

(《自體發光辦公室》劇照)

小人愈係鬼祟,你愈要對住佢光明磊落

小人之所以要喺你背後放箭,係因為佢無信心喺正面贏你,工作能力唔及你,人脈又唔夠你強,正面衝突的勝算太低,自然諗歪喺你背脊插幾刀,希望用把口毀壞你名聲、打擊你。

曾經有份工,我同一個是非精Jennifer坐同一間房,由於我知佢咩都會周圍講,所以我盡量都唔同佢講任何公事,最多只係傾下上網睇到啲咩搞笑片呀、點樣減肥快見效呀等等,總之愈無聊、愈無傷大雅就愈安全。

(《我的大叔》劇照)

其他文章:
【KAWS Holiday】打卡以外的KAWS:你付出很多卻沒相等回報
【三毛】Google首頁紀念76歲誕辰 流浪撒哈拉、愛情遭背叛不記恨​

直到有一次,老闆安排我負責公司全年最大型嘅Event。同老闆單獨傾嘢嗰時,老闆話如果太多嘢做可以搵A,B,C同事幫手,當中C同事平時只係需要幫老闆做嘢,其他人唔可以用佢嘅。我同C同事溝通咗,話係老闆叫我搵佢幫手,佢無問題亦好樂意幫我,點知是非精Jennifer行過,見到我竟然夠膽搵C同事做嘢,Jennifer一心以為終於捉到我痛腳,靜雞雞走去同老闆秘書講,話我當正自己係大家姐,私自用老闆嘅人……最後單嘢傳來傳去,老闆叫我入房講返件事畀我聽,叫我以後提防Jennifer,話覺得佢好八好麻煩之類。

(《我的大叔》劇照)

我聽完得啖笑之餘,諗一諗老闆句說話:「以後要提防Jennifer」?明槍易擋,暗箭難防,佢有心害我,我又點會防得到?所以我決定要令佢同我做朋

暗示畀是精知你知佢喺背後中傷你

首先,我要畀佢知道,唔好諗住喺我背後出手,我係會傻下傻下乜都唔知。我出返老闆房之後,就光明正大行埋去同佢講:「嚟緊個大Project,老闆都知道有好多嘢做,所以叫我搵A,B,C同事幫手。」完,唔需要交代前文後理,佢自己做過衰嘢,自然會心虛,所以佢一定聽得明當中嘅意思。

(《自體發光辦公室》劇照)

Jennifer聽完之後,嚟唔切反應,只係呆咗咁望住我,幾秒後:「哦。」然後我好嚴肅咁走開咗。

我係有心令佢跌入迷思的,等佢諗下、煩下,估下我點解會知?究竟我係咪真係知?以後撞口撞面係咪好尷尬?我會唔會以其人之道還佢其人之身?佢以後要點樣防我?

如果要我防佢,煩惱的是我;倒不如令佢防我,交個煩惱畀佢。

(《自體發光辦公室》劇照)

當是精諗緊點對付你你要諗點對佢好

正當是非精以小人之心度你君子之腹,你呢個時候就要主動對佢好,佢一定會更心虛覺得你唔知有咩企圖、陰謀。我嚴肅地向Jennifer暗示完之後,第二日返去我唔止好好笑容同佢講早晨,仲買埋零食請佢食,佢又係呆咗咁望住我,然後唔知點反應地講句多謝。跟手我仲要問佢忙唔忙呀?有無嘢要幫手?公司請到你真係好呀……超浮誇地擦佢鞋,我睇到佢眼神又驚又尷尬。

之後嗰個禮拜,我每日都好好笑容咁對佢,朝朝都講返上面翻說話,自此佢就唔敢再講我是非喇。

如果當初我選擇同Jennifer鬥搞是非,每日鬥智鬥力,肯定會心力交瘁。當然,以上方法只適合一般求安穩嘅打工仔,如果你係非升職不可,就要做足無窮無盡地中箭的心理準備喇。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。