職場「縮骨神功」累人累己 應對小人靠永恆自保法:盡早建立形象

撰文:
最後更新日期:

(《我要準時下班》劇照)

每日返工都好多同事表演各樣神功雜技,當中有啲同事嘅秘技係「無風起浪」,明明辦公室內人人都安然無恙,但呢種同事一出手就可以搞到人人雞毛鴨血。相反,有另一班同事就唔知係咪畀人害得多,防禦力超強,基本上佢乜都驚、乜都防,繼而進化成「縮骨神功」,咩都耍手擰頭話唔關自己事,務求任何責任都唔喺自己身上,將對膊頭有咁細縮咁細,比較常見嘅包括以下四大縮骨技能。

作者:詩寧

職場真正的「縮骨」同事,通常有以下4大特徵,你又不幸遇上過嗎?==>

第一類:乜都大大聲用把口做嘢

呢種同事永遠都好忙,無論何時何地佢見到任何人都會不斷強調自己好忙,永遠都有乜乜乜未做,就算你明明見住佢喺茶水間用大半個鐘沖咖啡,你行埋去,佢都會將件事包裝成:「哎呀,好多嘢做呀,唔飲咖啡真係頂唔順……」然後你見佢嘆完杯咖啡,再用多半個鐘洗杯。

曾經有個同事,佢好鐘意強調自己識好多人,成日話呢個佢朋友、嗰個又曾經喺咩咩活動上見過。但你叫佢做嘢?就發現佢咩都唔識做。舉個例子,我同佢講:「阿強,呢幅圖要加多兩個Graphic,你畫好之後畀返吖Annie印啦。」

阿強:「哦!係咪ABC 公司嗰個Annie呀?得啦,唔使急啦!我同佢公司個小明好熟架,我叫佢畀多兩日期啦。」

聽到我一頭煙,你同邊個熟、有幾熟,其實都係要做,呃多兩日唔代表你有幾威,只係畀我知道,人哋做一日嘅嘢,原來你要做三日。

《未生》劇照

第二類:擦鞋仔亂估老闆心意專喺中間攔

勤力唔一定有好下場,唔少人寧願花心神擦鞋、討老闆歡心,其實「擦鞋」唔一定係負面詞,但最怕就係有啲人亂估老闆心意,累到下屬或者其他同事白做。例如,要寫篇新聞稿,Officer寫完交畀Assistant Manager,但Assistant Manager就唔係睇篇稿寫得好唔好,而係估Manager會鐘意點樣嘅稿,亂估一通然後就畀返Officer叫佢改,改完先再一層層交到Director手中,篇稿已經面目全非。其實中間嗰堆Assistant Manager、Manager、Senior Manager全部都無話事權,但又要搵嘢改下證明自己存在,如果一早係由Officer直接同Director溝通,篇稿大約可以早四日出街。

我唔係話中間層嘅人唔應該改嘢,但遇到唔肯定嘅時候,應該問清楚上層要乜嘢,先叫下面改,而唔係驚驚青青縮埋一嚿自己估。

 

(《王牌大律師》劇照)

第三類:只願意做啲老闆睇到嘅工作

喺職場耐咗,你會發現所謂「叻與唔叻」、「做唔做到嘢」都係虛幻的,最緊要係形象,老闆「覺得」你係點,你就係點,佢成日聽到你話忙,你就係忙;老闆覺得你蠢,你就係蠢。所以,有啲人會揀嘢嚟做,如果份工作做完係交畀老闆,佢就會認真做、快手做,相反,老闆睇唔到嗰啲手尾同麻煩嘢,就彈晒畀其他同事。

同時,呢種同事唔會明顯地推Job,老闆派嘢畀佢做,佢一定話「好吖,我幫手,幫到一定幫!」轉個頭?返埋位低調地將個波彈走。

(《未生》劇照)

第四類:做完啲嘢收埋唔交變相偷咗其同事時

有啲同事鐘意將做完嘅工作收埋唔交住,到老闆催佢先交出嚟,即係佢交嘅時候已經係Deadline、係老闆等到忍唔住要出聲嘅時候,如果呢種人係你Teammate、Partner,你應該明白有幾燥,問親佢做完未,佢都話仲做緊,搞到你埋唔到尾/完全睇唔到佢嗰Part,到老闆問你:「Peter,單嘢搞成點?」你乜都答唔到,而一直拖嘅縮骨精就突然彈出嚟同老闆講:「老闆,我做好喇,係Peter未做咋,我交咗我嗰Part先吖。」

佢縮一縮,你就被「過一棟」。

最後,我想同縮骨達人講,其實光明正大地做人,並唔係想像中咁凶險,挺起胸膛唔縮骨,自己都舒服啲。

【第一屆武博】從李小龍到黃飛鴻,香港武術電影世界聞名,武博的「光影武林」隧道,以專業武術角度解構七套精選電影的武打場面,讓觀眾從大銀幕以外,真正了解武術的應用及背後理念。熱愛武術電影的你,必撐!5月3至5日,眼界.決定境界,九展見! 按此立即購票 ; 按此瀏覽武博專頁



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。